Vawiin khan Serchhip Auditorium-ah Sub.Headquarter YMA huaihawtin Education Campaign neih a ni a. Chief Minister Pu Lal Thanhawla chuan khuallian niin he hun hi a hmanpui a; Serchhip Education Campaign-ah hian Mizo thalai te All India Services(AIS), Central Civil Services(CCS), Staff Selection Commission(SSC) hnuaia hna te, Armed Forces leh Paramilitary hrang hrang hnuaia hnaah te leh Corporate Sector-ah te  tam zawka  an in ziahluh theih dan tur te sawi leh zirho a ni. 

Serchhip District Campaign rawn chhimtu zirlaite fuihna thu sawiin Chief Minister Pu Lal Thanhawla chuan hlawhtlinna bul intanna chu chhungkuaah a ni tih a sawi a. Thupektiam nei hmasa ber – Nu leh pa thu awih bakah aia upa zah thiam leh zirtirtu te thuawih a piang te chuan hlawhtlinna tura pawimawh te an nei nghal vek thin a  ti a.  Mahni insum thei, hriselna dah pawimawh, zuk leh hmuam bakah vaihlo kaihnawih thila fihlim chu Mizo thalaite, tuna siam tha thei mek tute tan thil pawimawh tak a nih thu a sawi a. 

Zirna sang zawk college  rap pha zingah pawh tumna nghet tak leh nihtum nei lem loa teirawlai mai mai hmuh tur an la awm thu a sawiin nihtum neih loh chuan hlawhtlinna chhan tur a awm lo a ni a ti.  Hindi hmuhsit leh saptawnga  tawng zah chu state pawna chhawrtlakloha Mizo thalai theina sang tak tak neite pawh hnukhniam tu a ni a ti a. Mizoram mipui nuai 12 awrh awmnaah sawrkar hna sing 5 bawr vel leh Kohhran hnuaia hnathawhtur tlem a zawng bak chu Company emaw hmun danga hlawh neia hnathawh tur a vang tih a tarlang a. Mipui nuai 10 zinga a tam ber ten kuthnathawhna a eizawnna dang thawh an duh si avangin state pawnlama hna hniam atanga hnasang zawkte pawh melh a ngai a ni a ti. 

Chief Minister Pu Lal Thanhawla chuan 1980 hnulamah AIS, CCS, SSC, Bank leh Sipai chi hrang hrang bakah Company hna tha zawk thawka inziaktling an tlem telh telh chuan ram tana hmathlir thui tak neite rilru a ti hah tawh hle a ni a ti. Tuna atang tawhin Mizoram chhunga hna pawimawh tak takte chu hnamdangin an luah tan tawh a. An rawtna thlen te leh an  thil rel anga angin Mizoram mipui te chuan duhdan pawh kalpui thei loa thupek zawm leh hnamdang hnuaia kun kan hmabak a ni a ti a. AIS, CCS leh Central Sawrkar hnapawimawh a inziah tlin chu sawrkar hna hmuh a ni ringawt loa hnam tana thil pawimawh a ni tel a ni a ti. “ In nu leh pa, in pi leh pu ten zirna tha, zirlai tha leh zirna puihtu hmanraw tha nei miah loin India rama hna pawimawh ber berah kum 1990 hmalamah kha chuan an lo inziak tling tawh a. Tuna engkim nei tawh, ram nghahfak thalai duhawm tak tak te hian in nu leh pa, in pi leh pute tih theih ang in tih ve theihloh na chhan hi a awm lo a. Harh chhuah leh ram tana thil pawimawh a ni tih in hriat thara tan in lak hi a hun tawh takzet a ni”, a ti a. YMA in ram leh hnam vein  Education Campaign a buatsaih chu lawmawm a tih thu leh a hlawhtlin ngei pawh a beisei thu a sawi a. Campaign buatsaih chhan Zirlaite chuan an rilruah vawiina thusawite leh zirtirna chu an vawn chhunzawm a pawimawh ber dawn  a ni a ti.. 

Serchhip District Campaign Programme hi Serchhip Sub.Hqtrs  YMA President Pu R.Sanghmingthanga’n a kaihrauai a. Resource Person-ah Chief Information Commissioner  Pu Lalduhthlana Ralte hman a ni a; Serchhip District mi pawimawhte paw’n thusawina hun an nei a ni.