3695/2023-2024

Dated Thenzawl, the 6th February, 2024: Vawiin khan Chief Minister Pu Lalduhoma chuan Silk Samagra-2 hmanga Mizorama Sericulture hmalakna thar project pathum; Rs. 624. 47 lakh senna tur Eri Project- Lai Autonomous District chhunga chhungkaw za thlan chhuah te nena kalpui tur, Rs. 588.36 lakh senna tur Mulberry Project- Chakma Autonomous District Council a chhungkaw za thlan chhuahte hmanga kalpui tur leh Rs. 1339.61 senna tur Muga Project, Mizoram pum huapa chhungkaw zanga thlan chhuah te nena kalpui tur chu Thenzawl Golf Course Auditorium ah a hawng. A hawnna inkhawmah hian Pu Lalthansanga, Sericulture Minister chu khualzahawm a ni.

Thusawiin Chief Minister chuan, khawvel pumah Muga Silkworm hi India ramah chauh a vulh theih a, India ramah pawh NE Indiaah chauh a kalpui theih a ni. Assam hian an thar tha thina, mahse nipui laiin Assam pawh a lum tawh lutuka, tlangram an rawn melh tan a. Mizoram hi a tha em em tih finfiah tawh a ni. Muga bik hi cocoon man a to fal hle a, a pangang hi kan thing neihsa Nauthak te, Bul thing te hmanga chawm theih an ni. Mizoramah Muga chi siam punna neih kan mamawh hmasaa, chumi tur chuan Central Silk Board lamin Muga P3 unit min pe dawn a, kan rama pangang vulhtute tan hlawhtlin theihna a sang hle ang, a enkawl dan thiam tawh chuan a hahdam hle, a ti. Vawiina project pathum kan hawn te hi farmer 700 huam tur hmalakna a ni a. A dawngtu tur thlan kawngah kan fimkhur tur a ni a, ruling party mi leh sa an nih avang duhsak bik neih te a rem kan ti lova, tunhmain chutiang tih chu kan lo ching tawh thin a, hmalakna ten a hlawhchham phah nasa thin a ni. Sawrkar tharah chuan mipui sawrkar kan nih ang ngeiin, tute emaw duhsak nana hmang lovin a hlawhtling ngei turte ngei thlan kan tum tur a ni, tiin a beneficiary thlan thuah thawktute chu dik taka kal turin a chah a ni. Tunah hian khaw 200 chuangah chhungkaw 4000 aia tamten pangang an vulh mek a, an tharchhuah hralhna rate hi sawrkar chuan tihsan a tum a ni, a ti bawk. Muga P3 Unit Mizorama an dah dawn avangin Central Silk Board chungah lawmthu a sawi a, Joint Coordination Committee tel tura NE states atanga lokal Sericulture official te chungah lawmthu a sawi.

Khualzahawm Pu Lalthansanga, Minister, Sericulture Department pawhin thusawiin, maimaw pangang khawi hi thingtlang lama kuthnathawktute tan eizawnna remchang tak niin ka hria a. A hralhna lamah harsatna a awm si lova, kan ram sik leh sa te nen a inmil em em bawk si a. Chuvang chuan kan uar deuh deuh a tul a ni, a ti a. Project thar pathum te hian nasa takin Mizoram cocoon tharchhuah a tipung dawn a, a vulhtute bakah a kaihhnawih eizawnna kawng tam tak a siam bawk dawn a ni, a ti.

Inkhawm hi Pu C. Lalrosanga, Secretary to the Government of Mizoram, Sericulture Department chuan a kaihruaia, kal khawmte lawmna thu a sawi a. Pu P. Sivakumar, IFS, Member Secretary, Central Silk Board leh Pu B. Lalchhuana, Deputy Director & Project Co-ordinator, Sericulture ten thusawina an nei a, Pu V. Zothansanga, Director, Sericulture chuan lawmthu sawiin a khar a ni.

He hunah hian Pangang vulha eizawngtute, Central Silk Board members leh scientist te, NE states hrang hranga Sericulture Director leh officials pawimawh te, Serchhip district chanchinbumite an tel a ni.