Chief Minister Pu Lal Thanhawla chuan nimin tlai khan serthlum tiak tihpunna hmunpui, Citrus Scion Bank, India rama a hmasa ber tur chu Horticulture Centre, Chite ah a hawng.

Chief Minister chuan serthlum tiak hrisel tha, natna kailo, kung thar dang tam tak siam theihna tur Mizoramin kan nei thei dawn ta hi a lawmawm tak zet a ni a ti a. Kuthnathawktute tan a thlamuan thlak hle dawn a ni a ti. Hmasawnna nei tur hian kan mithiamte thluak kan vaivir reng a tul a, mi hlemhle ten thlai tiak lem leh chhia hun rei tak chhung an lo pek thin kha, an sim theih nan, chutiang dinhmun hretu, kan mithiamte hi kan nawr kal reng a tul a ni a ti. Hmasawnna kawngah sorkar hnathawkte hi tunhma zawng aia tan la turin kan beisei bawk a ni a ti.

Horticulture Minister Pu H.Liansailova pawhin thusawiin, Mizoramah horticulture lama hmalak theihna hmun awm zawng zawngah tunah hian 10% vel chauh kan hmang rih a ni a ti.

Citrus Scion Bank hi serthlum chi tihpunna hmun a ni a, HMNEH 2011-2012 sum atanga, Hi-Tech Green House hmanga Argos Agri Project Ltd, Isreal ina din a ni a.He Green House hian hmun 2274 sq.m a zau hmun luahin, a hmanrua zawng zawng hi Isreal technology vek hmanga sak a ni. Serthlum tiakte hi a bika siam, bur, container ah kung 864 dah an ni a.Kung tin hian chi thar, a mit, scion atang hian kum 2 hnuah chi thar ,scion 2000 thleng a chhuah thei a. Heng atang zawng zawng hian kum 4 chhungin a tiak thar kung nuai 10 chhuak thei tura beisei a ni. Tunah hian hetiang ang hmun hi Sihphir ah leh Thiak khuaah te din a ni bawk a. Nakum chhung hian district dang 3 ah din leh tura hmalak mek a ni bawk.

Hawnna inkhawm hi Horticulture Secretary Pu T.Sangkunga’n a kaihruai a, Ministers, Speaker, Parliamentary Secretary leh Chief Secretary te leh Advocate General te an tel bawk a ni.

Chite a Horticulture Centre hi tunhma Assam hunlai atanga Mizoram sorkar, agriculture department ina alo enkawl thin a ni a. Tunah hian Horticulture departmentin enkawl chhunzawmin, kan than chhoh zelna tura ruhrel pawimawh tak tak 7 lai din a ni tawh nghe nghe a ni.

Attachment

  • Loading attachment...