HIV/AIDS natna in a tlakbuak te chhawmdawla, buaipuitu pawl SHALOM in kum 15 a tlin lawmna, Thanksgiving Funtion Chaltlang Tourist Lodge a an buatsaihah Chief Minister Pu Lal Thanhawla chuan a hmanpui.

Chief Minister chuan HIV positive te leh AIDS natna veite hi drugs addict te leh zu ngawlvei te ang thoa damlohna chi khat vei an ni a, hmangaih tak leh lainat taka enkawl hi kan tih tur a ni, a ti a. Hemi kawnga SHALOM hmalakna leh a thawhna chu a fakawmin a ropui hle a ni, a ti a. Heng damlo te hi kan endawng mai tur a nilo, a ti. SHALOM inpekna kum 15 lai alo tling ta hi ka lawmpui a, hetiang lawmna inkhawm urhsun taka an buatsaih chu a lawmawm tak zet a ni, a ti.

Shalom hi kum 1997 khan Emmanuel Hospital Association (EHA) hnuaiah Kristian te annghahna bulpui Bible nghenchhan chunga HIV leh AIDS darh zel tur do tura community health project anga din a ni a. Tunah hian Mizoram State Aids Control Society (MSACS) te, Evangelical Fellowship of India Commission on Relief (EFICOR), New Delhi, TEAR Australia, United Nations Office on Drugs and Crime (UNODC) leh EHA te nena thawkho a ni.

Thanksgiving functionah hian Dr. Howard Searle, USA, Founder EHA in Bible chang chhiara Hmangaihna nena HIV/AIDS veite enkawl a pawimawhzia a sawi a. Dr.Mathew Santhosh, Executive Director, EHA, New Delhi leh Pu Lalchuangliana, Executive Director, CONCERN, New Delhi ten thusawina an nei bawk a. Dr.Chawnglungmuana, Project Officer cum Medical Officer pawhin SHALOM chanchin tlangpui a sawi bawk a ni.

Inkhawm hi Dr.L.N.Tluanga, Member, Shalom Governibg Board in a kaihruai a ni.