Chief Minister chuan Sinlung Hills ah interim council rei tak a din hnu in inthlanna hlawhtling taka zo fel a, council din a ni ta chu lawmawm a tih thu a sawi a, Sinlung Hills area hmasawnna turin state sawrkarin theihtawpa a puih tur thu a sawi. An hmabakah hmasawnna ruangam duan tur tul tam tak a awm thu sawiin, a remchan dan ang zelin kawng tha te, office leh zirna in leh healthcare lamah te hmalak a nih tur thu Chief Minister chuan sawi a. Sinlung Hills area mai nilo Zoram pum thlirin hmasawn tura ngaihtuahna dik mipuiin kan neih tlan chu thil pawimawh tak a ni, a ti. Malsawmna hailuhna turin ram pek kan ni a, chumi tur chuan kan inpeih a ngai a ni tiin Chief Minister chuan ram zau tha tak, ruahtui thatna, sik leh sa nuam a cheng kan ni a, intodelh mai bakah state pawn a hralhchhuah tur nei thei tura malsawmna kan chan te hi hausakna atan kan hman a tul thu a sawi a. Chumi atan chuan SEDP kaltlanga hmalak a nih tur thu leh mipui tawiawmna a pawimawh thu a sawi.
Khualzahawm Speaker Pu Lalrinliana Sailo chuan bul tan that a pawimawh thu sawiin, dikna leh rinawmna chhawm nung turin Sinlung Hills Council sawrkar thar fawng vuantute a chah a. Hmasawnna tur sum, development fund lo kal turte leh staff thawktu tur lak chungchangah te tha taka bul tan ni se tiin, a hmanna tur dik taka hmang a, a mamawh leh phu tak tak te hnen thleng ngei se tiin a chah a. Hmasawnna tak tak hmu tur chuan tan rual leh thawhho a tul thu a sawi a ni.
Minister Pu Lalchhandama Ralte chuan mipuiten Pathian rawn chunga hruaitu tur an thlan tlinte chu theihtawpa an tawiawm leh an tawngtaipui a ngai dawn a ni, a ti a. Sawrkar bul tan tur, rahbi tuk chawp tur an nih dawn avangin mipuiten an theihna zawng zawnga an thlawp leh thawhpui a ngai dawn a ni, a ti.
SHC CEM Pu Lalthlamuana Hmar chuan council siam thei a mipuite tawiawmna chungah lawmthu sawiin, tha taka hma la turin mipuite tawiawmna an mamawh thu a sawi bawk a. HPC President Pu Thanglianchhunga hnen atangin thusawi ngaihthlak a ni bawk.
Attachment
- Loading attachment...
