Vawiin khan Chief Minister Pu Lal Thanhawla chuan Jesuit Society hmalakna a din St. Xavier’s College, Lengpui a Academic Building Block hmasa ber a hawng a, hemi hnuin College hawnna leh malsawmna programme a hmanpui nghal a ni. 

Chief Minister Pu Lal Thanhawla chuan Zirna chu hmasawnna tin reng innghahna anih thu sawiin vawiina ramchhunga ziak leh chhiar thiam state zinga a sangber pawl kan ni pawh hi zirna vang a ni a, hei hi missionary hmasa ten zirna an lo ngaihpawimawh vang ani a, vawiina kan dinhmun te hi anni in a tirah zirna rah an tuh vang a ni ti ila kan sawisual lovang, a ti. India ramah College 10 ber nia ngaih zinga 4 enkawltu Jesuit Society ten Mizoram ngei a  College an rawn din chu lawmawm tiin Mizoram hian kan mamawh aia tam College  kan nei tawh a, a thar hawn hi ka phurpui lova a chhan chu lehkhathiam mahse thiamna ziktluak nei lo, kuthnathawh zak leh hmusit, nu leh pate chawmhlawm ni hreh lo kan chherchhuah tam ang tih ka hlauhthawnpui vang a ni. Mahse tun a College hi chu Jesuit Society khawvel huap pawha zirna in tha leh hmingthang, zirlai chhenfakawm leh chhuanawm tak tak chherchhuaktu an ni a, an chanchin leh an hnathawh that dante hi hriain an sawmna hi ka pawm ta a ni, a ti a. Mizoram a college te inelna ber chu khua leh tui tha, mahni kea ding thei chherchhuahna lamah nise tiin a duh thu a sawi bawk. 

Pu Lal Thanhawla chuan Mizoramin Primary leh Pawl 12 thleng zirna tha pawl a neih tawh thu sawiin zirna sang zawk leh technology lamah rualawhna a la na deuh a, hei hi chona lian tak a ni, a ti. Hmun tam tak leh Mizoram pawh tiamin zirna in tha ber ber chu Katholik Kohhran enkawl a ni fo a, zirna an ngaihpawimawh dan kan hmelhriat vek awm e tiin St. Xavier’s College chu hun lokal zelah College tha leh hmingthang ni se tiin duhsakna hlan a. Bishop Stephen Rotluanga leh a thawhpui te thahnemngaihna avanga St. Xaviers College din a ni ta chu lawmawm tiin an chungah lawmthu a sawi a.  College a zirlai te chu Kristian College ah an kal ani tih hriain zirlai dangte tan entawntlak leh College ti hmingtha tu ni turin a fuih a. College campus chu a la hrin that avangin chu chu humhalhpui turin Lengpui khawtlang leh tlawmngai pawlte a sawm a, VC te chu huan leh ram an peknaa college ram nekchep lo turin a hrilh bawk a ni. 

College hawn naah hian Pu John Siamkunga, MLA Chairman Mizoram State Law Commission leh Pu Chalrosanga, MLA te pawh an tel a. Aizawl Bishop Most Rev. Stephen Rotluanga chuan Pathian hnenah tawngtaina nen College a hlanin thu a sawi bawk a. Jesuit Society aiawh Darjeeling Province hotupa Father Kinley Tsering pawhin thu sawiin Mizoram Sawrkar leh Mizo mipuiin an lo dawnsawn that avangin lawmthu a sawi a ni. 

St. Xavier’s College hi November 2016 khan sak tan a ni a. Tunah chuan Academic Building pakhat chiah la sak zawh a ni a. Building dangte sak mek niin Swimming Pool leh Football Field te pawh sak tum a ni a. Class XI leh BA First Semester ah naupang 35 in kuminah bul an tan a ni. Principal hi Father Dr. Daniel Bara a ni. 

Jesuit Society enkawl mek St. Xavier’s College Mumbai; St. Xavier’s College, Kolkata; Loyala College Chennai leh St. Joseph’s College. Bengaluru te hi India college tha ber 10 te thlanchhuah zingah an tel mek a ni.