Chief Minister Pu Lal Thanhawla’n vawiin khan Aijal Club-ah National Bank for Agriculture and Rural Development (NABARD), Mizoram Regional Office, Aizawl in a buatsaih State Credit Seminar 2014 a hmanpui.

Chief Minister chuan Mizoram Regional Office NABARD in hmasawnna siam tura hmalakna thahnem takah Mizoram sorkar a puihbawm thin naah lawmthu sawiin, loneimite tana hamthatna dap sak tura hetiang seminar a buatsaih chu a lawmawm hle a ni a ti. Chief Minister chuan kum 2013 March thla tawp a a lan danin Reserve Bank of India in Priority sector leh agriculture a hamthatna thlen tura a bituk an phalo hle a ni a ti a. Bank mite chu heng bial pawimawhah te hian mumal zawk leh awmze nei thama tan la thar turin a ngen a ni.

Chief Minister chuan NLUP dawngtu ten chak zawka an intodelh theihna turin awlsam zawka loan pe thin turin bank hnathawkte chu a chah a. Kum 2012 leh 2013 inkar chhunga priority sector-ah credit an pekchhuah chu 7% in a pung nain, policy target chu an phalo hle tih Pu Hawla chuan a tarlang a, credit deposit ratio pawh duhthu a sam lova, all India average tal pha turin credit deposit ratio hi an tihpun a tul a ni a ti. Ran vulh tute, a bikin vawk vulhtute hnena credit linked subsidy an pek thin hi thil lawmawm tak a nih thu sawiin, hetiang subsidy pek tam lamah ram pumah Mizoram chu pathumna a ni pha hial a ni a ti.

Micro credit ah Self Help Group (SHGs) te hnenah loan tam zawk pe thin turin Chief Minister hian a ngen bawk a. Kum 2013 March tawp ah SHG 3063 te hnenah bank hrang hrangin Rs.16.49 Crore credit an pek thu a tarlang bawk a. Kissan Credit Card (KCC) pawh uar zawka kalpui turin a chah bawk a. Thingtlang kilkhawr ber thlenga bank te chu inzar pharh tura chahin financial inclusion pawh hi sorkar agency te, bank te leh NGOs te nen mission mode a kal tha a a hriat thu a sawi bawk a ni.

Chief Minister hian State Focus Paper for 12^th Five Year Plan 2012-2017 a tlangzarh nghal a. State Focus Paper a credit potential Rs.675 Crore priority sector tana an ruahman chu a lawmawm hle a ni a ti.

Seminar-ah hian Pu P.L.Thanga, Vice Chairman, NLUP Implementing Board chu Khualzahawm a ni a, Pu S.S. Barik, Regional Director, RBI, Guwahati chu Khual Vohbik a ni bawk. Dr. Aparna Kolte in powerpoint presentation nei bawkin, seminar neih chhante sawifiahin, NABARD hmalak tur te a sawifiah bawk a ni.