Nimin khan Thenzawla Handloom Complex chhungah Chief Minister Pu Lal Thanhawla’n Handloom Export Facilitation Hub dinna tur lungphum a phum.

Chief Minister chuan Thenzawl chu handloom khawpui tur atan sorkarin a siam dawn a, a khaw mipuiten rilru fim tak pu a, hmathlir thiam tak nei turin a chah a. Mizo puantah zemawi tak takte hi midangten ta anga min chhuhsak lohna turin Mizo ta bil anihna turin kan ‘patent’ a pawimawh a ni a ti a. Thenzawl chu la thang zel tur anih angin a mi chengten an ram  chu tiral lova, humhalh tha tlat turin a chah a. Hei hi project lian kalpuina turah ram awl pek angaih thin avangin ngaipawimawh turin a ngen a ni. Chief Minister chuan Thenzawlah Horticulture College te, Mega Tourist Hub, golf course changkang tak awmna tur leh private university te la din chhoh tum anih thu a sawi a. A khawbuzawlin a zir angin, a mi chengte pawhin an zir a tul dawn a ni tiin, chumi lam hawia rilru thar an siam angai dawn a ni a ti.

Chief Minister chuan hna reng reng hi hmeichhe thawh bik tur emaw mipa thawh bik tur emaw a awm hranpalo tiin, puantah pawh mipa in a ti thei a ni a ti a. Eizawnna tling anih chuan tupawhin kan thawk thei a ni a ti. Chawmhlawm nih ai chuan thawhchhuah neih a zahawm zawk Pu Hawla chuan a ti.

Chief Minister chuan Mizo puan te hi hnam dangten mawi an tih thu sawiin, helai hmun atang hian Mizoram pawn mai nilo, India ram pawn thlenga mi ngaih hlut leh mawi tih a ni hi he export facilitation hmunpui tur atang hian thawn chhuah leh hralh chhuah a ni dawn a, puantah te chu rawng inchawih mawi (color combination) thei ang ber tur thlan thiam a tul tur thu a sawi a ni. Mizorama cheng zahve te hi thalai an nih thu sawiin, Pu Hawla chuan heng kan thalai tam tak tan hian he hmun turah hian training chi hrang hrang nei a, eizawnna thlengin hna a awm thei dawn a ni a ti.

Industry Minister Pu H.Rohluna chuan chu Mizo zeding puan tam zawk hi Thenzawl kutchhuak a ni a ti a. Puantahtute hamthatna tur leh hmanraw changkang zawk hman anih theih nan central sorkarah thleng tul angte haichhuah anih thu leh Plan 11th na chhungin Rs.90 crore haichhuah a ni a ti a. He Hub din tur hi Pu Lal Thanhawla’n puanthatute hmakhua angaih avanga hmalak anih thu a sawi a. Ram pawn thlenga thawn chhuah tur puantah design buatsaih nana hman tur a ni tiin, Rs.8.37 Crore ruahman a ni a ti. Minister chuan tun 12th Plan chhung hian hmarchhak bik tan Ministry of Textiles chuan NERTPS scheme duangin, chumi atang chuan tanpuina hrang hrang Mizoram sorkarin a dawn thu sawiin, ‘Cluster Development Project’ 17 tan (Thenzawlin cluster 1 a chang ang) Rs.16.44 Crore sanction ah Rs.3.58 crore pekchhuah tawh a ni a, ‘Integrated Skill Development Scheme’ ah Rs.112 lakhs pawm tawhin, Thrnzawlah mi 90 training pek an ni anga, sipend nitin Rs.75/- pek an ni bawk ang a, “Technology Upgradation Project’ hnuaia khawl inpek turah Rs.2.56 crore pawm a ni bawk a, ‘Release of 10% Rebate’ ah puan hralhna man 10% tanpui na tur te, ‘Weavers Credit Card’ hnuaiah awlsam zawka puantahtuin loan a puk theihna turte, ‘Weavers Service Centre’ ah puantahtute technical lama tanpuina tur te leh ‘Apparel & Garments Production Centre’ la din tur hi Textiles Minister-in a lung a phum tawh a, heta tang hian thuamhnaw thui sa ram danga thawn chhuah tur dehchhuahna hmunpui tur a ni a, Tanhrilah bul tan mek a ni Minister chuan a ti.

Pu Joseph Lalhimpuia, Parliamentary Secretary pawhin thusawiin kan puantahte hi a neitu nihna kan hauhna turin ‘Patent’ turin hmalak mek a ni a ti a. He puantahna hmunpui turah hian trainingna hmun te, designing-na hmun te, puan zawrhna hmunpui te, khawl awmna te leh chenna hmunte siam a ni ang a ti. Mizoramah puantah siamchhuahna leh hralhna lamah kumtin Rs.10 crore vel a che reng a ni a ti.

Chief Minister hian Buangpui khua chu a bial chhunga ‘Model Village’ah a puang bawk a ni.