Zirna Sikul leh a kaihhnawih chungchanga hriattur pawimawh te vantlang en theihna tura pho chhuah Launching of Total Information on Schools and Teachers (TIST) chu vawiin chhun khan Chief Minister Pu Lal Thanhawla’n Recess Room, Assembly House Annexe ah a hawng. He hun ah hian Assembly Speaker Pu Hiphei, Cabinet Ministers, Parliamentary Secretaries, Minister of States te bakah School Education Department hotu ten an hmanpui a ni.

Finna leh thiamna min petu chu Zirthiamna – Education hi a ni tiin Pu Lal Thanhawla chuan vawiinah Mizoram thingtlang kil thlenga a mamawhte en theih leh chhawr tangkai tur hmasawnna chhawpchhuah a ni leh he software TISS buaipuina kawnga hmalatu te hnenah lawmthu a sawi a. Mizo Thalai ten inelna tha Competitive Spirit an neih zel theihnan a tha zawnga kan inher rem thiam zel a pawimawh a, hetah hian hotute hmalakna apawimawh in insiam rem chho zel tura an thawhna pawh fakawm atih thu a sawi.

IT lamah kan than chhoh mek laiin hmasawnna tur a la tam a, Education Department mai ni lovin, Department hrang hrangah hma kan sawn a, tunah phei chuan Mizoram chhung mai nilovin India ram leh khawvel hmun hrang hrang thlengin heng IT kaltlang hian inbiakpawhna mai bakah hriat duh zawng en theihna a chak in a tha em em tawh a, Mizoram hmasawnna leh hmasawn lohna ngei pawh hian thlir a hlawh a ni tiin Chief Minister chuan Khawvel thlir tlaka kan awm a ngai a, Dikna hi kan ramah lal ber se, Sorkar hnathawk te pawh tihsual nei palh lo tura fimkhur in, an hnathawhah dik tura tan an lak a ngai a ni, a ti a. A duh leh mamawh apiang ten tangkai taka an hman leh chhawr tur in Chief Minister chuan Total Information on Schools and Teacher (TIST) chu a hawng nghal a ni.

Education Minister Pu H Rohluna pawh in thu sawiin vawiina TIST software hmang hian school hrang hrang awmna awlsam taka hmuh theih tura ruahman a niin school mapping atang hian school dinhmun, naupang awm zat, zirtirtu awm zat leh tu te nge an nih tih bakah school academic record kimchang hmuh theih in a awm dawn a ni a ti a. Mizoram chu state 4 Pilot state zingah kan tel thu sawiin, North East State zingah Mizoram chu cover an duh ber a ni a, TISS te nen pawh MoU ziah a ni tawh a ni, a ti.

Pu Rohluna chuan HSLC leh HSSLC Selection test/Exam tihtawp a nih avangin kumin ah Private candidate nasa taka an tlem thu sawiin, kuminah chuan HSLC-ah candidate 4767 a tlem dawrhin HSSLC ah pawh 2637 laiin candidate an tlem zawk a ni a ti a. 2016-17 Academic Session atanga hman tan turin Evaluation Scheme thar HSLC leh HSSLC Examination tan siam a nih thu sawiin, hemi Scheme hi kalpui a nih hun ah chuan External Exam in mark 80 leh Internal Evaluation/Exam in mark 20 a pu dawn a, selection test a awm tak loh avangin Evaluation Scheme chu zirlaite tan tangkai hle tura beisei a nih thu a sawi bawk.

Education Minister chuan TIST chu School Education Department administration atan a tangkai dawn thu sawiin, zirtirtu Transfer & Posting chungchangah leh service matter hrang hrang promotion, Service Grade leh Selection Grade-a a hun taka an kai theihna atan leh pension turte tana tangkai taka hman theih a nih tur thute a sawi bawk.

TIST software hi online software anih vangin thuneituten khawi hmun atang pawhin school leh zirtirtu dinhmun kimchang englai pawhin an hmu thei dawn a. Software-a information awm te chu a hmu theitu tur chin leh an hmuh theih chin bithliah felfai taka siam anih avangin information pawimawh a hmu lo turin an lo hmuh palh tur a veng thei dawn a. He software hi regular taka update a nih dawn avangin Decision Support System tangkai tak a ni thei dawn bawk.

Vawiin Total Information on Schools and Teachers ( TIST ) hawnna Pu P. Lalchhuanga, Education Secretary kaihhruaiah hian Education department buatsaih ‘Finna kailawn’ video show en ho nghal a ni.