Chief Minister Pu Lal Thanhawla chuan vawiin chhun dar 12:30PM khan Serchhip Medical Complex-a NEC sum Rs.49.80 lakhs senga sak thar Trauma Centre leh NRHM sum Rs.19.62 lakhs senga sak Blood Bank chu a hawng.

Serchhip DC Pu H.Darzika kaihhruai hawnna inkhawm neihah Chief Minister chuan thu sawiin mizote chu hriselna lam kan ngaihthah avanga damlo inenkawl nana tullo taka sum tamtak seng thin kan ni a ti a, phai lama sorkar hnathawk inenkawlna senso ringawtah pawh Mizoram sorkar chuan sum tamtak a bat mek thute a tarlang bawk. Mipuite chu mahni inbihchian nachang hriaa insiamthatna turahte hma la theuh turin a chah a, chutiang kawnga mipui hrilh hriaa zirtirtu tur chu Health Department an nih thu a hrilh bawk. Mizoram chu khawvel puma cancer tamna ber a ni a, Serchhip District chu Mizorama cancer tamna ber anih avangin zuk leh hmuam insum leh invawn thianghlim kawngah nasa lehzuala tang turin a fuih bawk. Doctor leh Nurse hna chu missionary hna a ni tiin hmangaihna leh lainatna nena thawk thin turin a fuih. Mizoram damdawiin hrang hrangte pawh sorkar chuan a ti changtlung chho zel a, hmantlak loh bungrua/hmanrua man to tak taka lei thinte chu titawpa bungrua hmantlak chauh lei a nih zel tawh tur thu a sawifiah bawk. District 7-a college of nursing din nan central sorkarin sum min rawn pek thu puangin Chief Minister chuan Thenzawl-a Ayush Hospital khum 50 awmna dinna tur hmun te pawh Health Minister hova an enfel anih tawh thu a tarlang bawk.

Health Minister Pu Lalrinliana Sailo pawhin Health Department hmasawnna hrang hrang avangte leh Chief Minister-te nupain thahnemngai taka hma an lakpuinaah lawmthu a sawi a, kum kalta September thla atanga vawiin thlenga mit 17 transplant tawh avanga mitdelten mitvar an lo nei ve ta chu ropui a tih thu a tarlang bawk. Dr Malsawma, CMO, Serchhip chuan Serchhip-a Health Department hma lak mekna hrang hrangte a sawifiah a. Mizorama la awm ngai lo Sterilizer - Health Department-in Rs. 55.00lakhs-a a leithar chu Serchhip Hospital-ah a lo thlen tawh thu a puang bawk. Trauma Centre Building zau zawng hi 415.84Sqm a ni a, Blood Bank hi a chungah sakzawm niin a zauzawng chu 153.86 sqm a ni.

Vawiin khan Health Department huaihawtin Serchhip Medical Complex-ah Chief Minister's Free Medical Camp neih a ni a, Aizawl atangin Dr James Thanzama, Skin Specialist hovin specialist rual leh medical staff 40-te an lokal a, Dr B.Baruah, Hospital & Medical Education Director leh Aizawl Civil Hospital Medical Superintendent Dr Lalbiakkima te pawhin an hmanpui a ni.