1415/2024-2025

Dated Aizawl, the 2nd August, 2024: Nimin August ni 1 khan Chief Minister Pu Laduhoma chuan New Delhi ah Union Home Minister Pu Amit Shah, DoNER Minister Pu Jyotiraditya Scindia leh mi pawimawh dangte a kawm.

Chief Minister hian, tun hnaia Central sawrkarin raltlan (displaced persons) te tana Mizoram sawrkar Rs. 10 crore a rawn pek avangin lawmthu a sawi. Manipur harsatna tawh thuah Home Ministry leh Manipur tlangmi mipuite aiawh ITLF hruaitute chuan inbiakna nei thei se thaa a hriat thu a hrilh a. Pu Lalduhoma hian Manipur Chief Minister Pu Biren Singh-an Imphala zin tura a sawm thu pawh Pu Amit Shah hi hrilhin tihhlawhtlinsak a duh thu pawh a sawi a ni. Assam Rifle sawn chhuah chungchang pawh an sawidun a. Assam Rifle lamin an MoU tur an peih har avanga hmalakna a khawtlai tak thu sawi lan a ni. Home Minister hian, Ministry atangin officer lian pahnih ka rawn tir anga, anni hovin Aizawlah AR lam te nen lo sawidun leh ula,  tiin hmalak zel dan tur a ruahmanna a lo hrilh a. A tahtawla an chhuah phei a tul tur thu pawh a sawi a ni. Chief Minister hian, Assam Rifle leh Mizoram sawrkar ngaihdan inhmu rem lo lai te a awm anih chuan inpawh taka sawiho an inpeih thu a hrilh ve bawk. Pu Amit Shah hian, Cyclone Remal tuartute endika rawn kal special team te report hi Finance lamah a la awm rih a, a rang lamin kan lo ngaihven anga, chhawmdawlna sum pawh engemawzat kan rawn pe ang che u, tiin Chief Minister hi a lo hrilh bawk.

DoNER Minister Pu Jyotiraditya Scindia nena an inkawmnaah hian Serchhip district hospital sak dan tur re, Mizoram a oil palm chingtute chungchang leh Ministry of DoNER hnuaia Mizoramin pending projects a neih chungchang te an sawi a.

Oil Palm chingtuten hlawk zawka an thar theih nan Mizoramah Samadhan Centre dah ve ni se. Huan neitute mamawh tui, leitha leh link road te titha ila, tuna an thar mek dan Hectare khata 7 Metric Ton atanga15 Metric Ton vel tal an thar chhoh theih dan tur dappui ni se, an ti. Bukvanneia a herna khawl hi an oil her chhuah phurhthlakna a thui tham avangin 'hloh' zelin an la kal nia sawi a ni a. Awmze nei zawka a kal theih nan Mizoramah Refinery hi din law law ni se thaa an hriat thu pawh an sawi a ni. Tuna hian DoNER Ministry ah Mizoramin a thehluh project inchiah (pending) mek 93 a awm thu leh heng atana sum ruahman zat chu Rs. 1716 Crore vel anih thu te, project inchiah rei zual te phei chu kum 24 a upa a nih tawh thute DoNER Minister hian Chief Minister hi a lo hrilh a. "Project inchiah rei tawh tam tak, vawiina han kalpui atana fuh tawh lo te hi project tharin rawn thlak ula, ka lo pawmsak ang che u" tiin a lo hrilh a ni. 

Nizan vek khan Chief Minister hi Pu Tapan Deka, Director, IB chuan Mizoram House ah hmuin Mizorama hmalak dan tur thil te an sawi dun a ni.

Delhi ah hian Chief Minister hian JICA hotute leh KMMTTP Contractor te pawh kovin an hnathawh mek leh hmachhawp awm te a sawipui bawk.