New Delhi a cham mek Chief Minister Pu Lal Thanhawla chuan tukin khan Union Home Minister Pu Sushil Kumar Shinde hmuin darkar 3 zet an inkawm.

Chief Minister hian IAS leh IPS transfer and posting chungchangte, joint cadre authority chungchangte leh hmarchhaka AGMUT cadre transfer and posting chungchangte Union Home Minister hi a sawipui a. Home Minister hian IAS leh IPS te transfer and posting chungchangah a hnuaia officer ten an rawn ngai loh thu Chief Minister hi hrilhin, hemi chungchang hi Mizoram House, New Delhi a Resident Commissioner Pu Chetan B Sanghi, IAS in kimchang taka ziakin, ni 7 chhunga amah ngei hnenah pe turin a ti a. Hei hi sawidun leh hnuah bawhzui a ni ang tih Chief Minister hi a hrilh a ni.

Pu Lal Thanhawla hian Mizoram Police modernization chungchang leh Home Department tana tul pawimawhte sawipui bawkin, tunhnaia NLFT nia rinhlelh ten Mizo an rukbo chungchang pawh Pu Shinde hnenah hian a report bawk a ni.

Hengte bakah hian Pu Hawla chuan Kuki National Organisation (KNO), Manipur sorkar leh Central sorkar te inkarah inremna a awm theihna turin hma a lakpui bawk a. Hemi chungchangah hian inkahhai (ceasefire) an puanah KNO chuan a zawm tha hle a ni tih Pu Shinde hi a hrilh a. Hetih lai hian Manipur sorkar leh Central sorkar atanga ngaihven (respond) an nilo chu an lungawilo hle a ni tih Pu Hawla chuan a sawi bawk a. Thil duhawmlo a thlen loh nan inbiakna nei leh thuai turin Pu Shinde hi rawnin, ani (Sushil Kumar Shinde) chuan Manipur sorkar nen inberawn chunga hma lak thuai a ni ang a ti.

Chief Minister hian Pu Shinde chu Mizorama lo zin ve tura sawmin, a ni chuan Parliament Thutkhawm zawhah zan khat riaka lo zin a tum tur thu a sawi a ni.

Chief Minister hi Pu Chetan B Sanghi, IAS, Resident Commissioner, Mizoram House, New Delhi in a tawiawm a ni.

Chief Minister hian ni 25 thawhtanni khian meeting pawimawha a tel hnuah, chawhnu dar 1 ah Prime Minister a hmu anga, dar 2:30 ah Rahul Gandhi a hmu leh ang a; tlai dar 6 ah Chanakyapuri a Mizoram House sak thar a hawng ang.