Nimin a India President 13-na ni tura Pranab Mukherjee lakluh inkhawma a tel remchang a laiin, Chief Minister Pu Lal Thanhawla chuan Union Minister thenkhatte kawmna hun remchang a neihpui.

Chief Minister chuan Union Tourism Minister Subodh Kant Sahay nen Thenzawla Golf Course tur buaipui mek chu sawipuiin, lo enzui a tiam a. Health Minister Gulam Nabi Azad pawh hmuin, MBBS seat allotment chungchang sawipui bawkin, lo enzui a ni ang a ti bawk.

Pu Hawla chuan Punjab Chief Minister Parkash Singh Badal pawh hmuin, Capt. Melody Lalengmawii thih chungchanga enquiry uluk taka la tura alo ngen tawhna chu sawipuiin, Badala chuan lo tih ngei a tiam a ni. Chief Minister hian Pawan Hans Chief Managing Director hmu bawkin Mizoramah Helicopter service August ni 15 hma ngeia tan tum anih thu sawipui bawkin, Pawan Hans chuan englai pawha an inpeih thu alo hrilh bawk a ni.

Chief Minister hian zanin dar 10 hian Defence Minister AK Anthony a hmu ang a, Mizorama Helicopter service chungchang a sawipui ang.