Mizoram sorkar Vigilance Department in gazetted officerte tana a buatsaih ‘Workshop on Inspiring Changes’ tih thupuia hmanga vawiina Vanapa Halla huaithawt chu Chief Minister Pu Lal Thanhawla chuan a hmanpui.

Chief Minister chuan sorkar hnathawk zawng zawng te chu CCS (Conduct) Rules in a phuar vek thu sawiin, a tam zawk erawh chuan he Rules hi an hrechiang tawklo hle a ni a ti a. Kan thil neih reng reng, khawih chet theih leh khawih chet theih loh zawng zawng te chu (property returns) a bo a bang awmloin sorkarah kumtin kan report thin tur anih laiin, report thehlut ngailo leh kimchanglo taka report thin ani chu conduct rules bawhchhiatna a ni a ti a. Property Returns a hun taka siam thin hian eirukna dona kawngah a pawimawh hle a ni a ti a. Eng hna pawh thawk ila Pathianin a rawngbawl tura min dahna a ni tih hria a rinawmna, dikna, taimakna nen tui taka kan hna theuh thawh hi kan tih tur pawimawh tak a ni a ti.

Chief Minister chuan ringtu kan nih angin sorkar chak leh tha, mipuite mamawh pe thei, langtlang leh mipuite tana nelawm siamtu tur theuh kan ni a, state dangte entawn tura kan awm angai a ni a ti a. Heti chunga corrupt tak tak kan awm hi a huatthlala awma, a zahthlak hle a ni a ti a. Mipui vantlang te aia kan hna theuhah thahnemngai zawk tur kan ni a, keini aia hnuaihnung zawkte zah tur leh enkawltu kan nih angin mite zahkai ni tura kan awm a tul a ni a ti a. Mipui rawngbawltu kan ni tih inhriaa, hun vawn dikte, work culture leh work ethics te kan ngaihpawimawh a tul tih sawiin, Chief Minister chuan mipuite mamawh tih sak vek theilo mahila, rilru nuama kan siam a tul a ni a ti. A hun leh hmunte a zirin inchei dante pawh kan thiam a tul a ni a ti a. Kan hnuai hnathawk ACR kan ziah danahte an nihna ang anga dik taka ziah mai tha a tihthu a sawi bawk a. Chief Minister chuan MPSC chu zahawm taka siam sorkar chuan a duh a ni tiin, pensiona chhuak nazawngin awm an in beisei thin chu thalo a tih thu a sawi a. MPSC enkawltu tur te chu vantlang chunglam, mi thiam leh zahawm an ni tur a ni a ti.

Chief Minister chuan workshop chu officer kalkhawmte chuan tangkaipui hle tura chahin, sorkar danglam dawrh thei khawpa hmang tangkai turin duhsakna a hlan a ni.

Chief Minister hian Vigilance Department Website thar a hawng nghal bawk a ni.

Chief Secretary Pi L.Tochhong chuan hawnna thuchah sawiin, workshop chu tunhmaa la tih ngai loh a ni thu a sawi a. Sorkar hnathawk tura kan luh phat atanga conduct rules in min phuar nghal thu a sawi a. Officer tam takin property transaction leh conduct rules ngaihsak ngailo kan awm chu a pawi hle thin a ni a ti a. Kan neih hlu khawih chet theih lohte chu danin min phut angin a formah kan ziak lut vek thin tur a ni a ti a. Khawih chet theih thil kan thla hnih basic pay aia tam te pawh a form hmanga report siam vek tur anih thu a sawi bawk a.Report diklo siam chu conduct rules bawhchhiatna anih thu leh report dik tak siam chu sorkar hnathawk te tih makmawh a ni a ti.

Inkhawm kaihruaitu Pi Nandini Paliwal, IAS, Special Secretary, Vigilance Department chuan workshop buatsaih chhan chu gazetted officer ten Conduct Rules leh Property Returns chungchang fiah zawk leh kimchang zawka kan hriat theih nana tih a nih thu a sawi bawk a ni.

Hawnna inkhawm hnu hian power point hmangin CCS(Conduct) Rules, 1964 pawimawh zual laite inhrilhfiahna hun hman a ni a, sawihona leh zawhna hunte hman a ni bawk.