International Day of World Indigenous Peoples champha vawi 5-na Zo Reunification Organisation (ZORO) in vawiina Vanapa Hall-a a lawmna a buatsaih chu Chief Minister Pu Lal Thanhawla chuan a hmanpui.

Chief Minister chuan UNO in kum tin August ni 9 hi ‘International Day of the World’s Indigenous People’ atana a puan chu Mizoramah pawh hun engemaw chen atang khan hman a ni ve tawh thin a ni a ti a. A tum ber chu ram leilung fate dikna leh chanvo chawisana humhalh a ni a ti a. Kan hriattur pawimawh tak chu ‘indigenous people’ tih hi a hranpa a sawifiah a nilo a ni a tiin, India sorkarin a pawm ber chu tunhma a ramdangin an lo awpbeh (colonize) thin te a huam vek a ni a ti a. Chuvangin India independence laia India khua leh tui zawng zawngte chu ‘indigenous people kan ni vek’ a ni a ti. Hetah hian tribal tih leh indigenous people tih hi sawi fin loh tur a ni a ti.

Chief Minister chuan India hmarchhak hi India in independence a hmuh hnu kum rei tak chhung, inkalpawhna te a that tawk loh bawkte avangin, hnuchhawn ram ni angah kan inngai thin a. Hei vang hian lungawi lohna te lantirin, tharum hial thawhnate pawh a thleng thin a ni a ti a. Mizoram pawh kum 20 chhung zet rambuai kan lo ni tawh a ni a ti.Hetiang hi kan ni chungin keini ho vanneihna chu Indian Constitution tha tak mai kan nei a, hnam te zawk leh hnufual zawkte tan kan chanvo dik tak kan chan ve theihna alo awm vek a ni a ti.Hei hi thiam taka hman tangkai kan tum tur a ni tiin, central sorkarah pawh a hranpa ngatin Ministry of Tribal Affairs te, Minority Ministry leh Ministry of Social Justice and Empowerment te siam a ni tawh a. Hengte hi State puitling kan nih ve tawh naah thiam taka kan hman tangkai chuan kan tan kawl a eng em em dawn a ni a ti.

Zo hnahthlak hnamte hi Kumpinu ‘divide & rule’ rorelna tuar nasa ber kan ni Pu Hawla chuan a ti a. An rorelna avanga hmun hrang hrang, Myanmar-ah te, Bangladesh leh India chhung Tripura, Manipur leh Assam ah te awm darh mah ila, engtikni ah emaw chuan Pathianin rorelna khat hnuaiah min la hruai khawm hi ka ring tlat a ni a ti a.Tuna kan awmna theuh hi Pathian remruatna a ni a, chuvangin dawhtheihna leh taimakna nen A chanchintha hril turin tan kan lak tlan zel a tul a ni a ti. Zo Hnahthlak insuihkhawm lehna tura ZORO hmalakna chu ropui a tih thu sawiin, Pathianin mal a sawm ngei a beisei thu a sawi bawk a ni.

Chief Minister Pu Lal Thanhawla hi ZORO duh danin Zopa incheiin a inthuam a, he ni lawmna hi UNO Flag pawtpharha hawngin, lehkhabu tlangzarhna a nei bawk a ni. Kalkhawm mipui lam pawh hnam incheiin an inthuam deuh vek a ni.

ZORO President Pu R.Thangmawia chuan Zo Hnahthlak hnam te hi kohna hrang hranga koh an nih dan te a sawi a. Zo tih chu hnam hrang hrangte khaikhawmna a ni tiin, Mizo, Zotung, Zophei, Zomi, Zobawm, Kuki (tlangmi tihna), Chin (bawm phur tihna) etc tihte a koh kan nih thu a sawi a. ZORO tum ber chu kum 1892 a Calcutta a Chin - Lusei Convention neih tuma “Excluded Area’ ram chhunga Tualto Hnam, ‘indigenous people’ Zo Hnahthlakte rorelna khat hnuaia dah a ni a ti.

World Indigenous Day lawmna ah hian Bangladesh, Myanmar, Manipur leh Tripura atangte in palai an tel a, Inkhawm hi ZORO Vice President Pu L.Malsawma Colney in a kaihruai a ni.