No.1480/2020-2021

Aizawl the 29th May, 2020: Vawiin khan Chief Minister Pu Zoramthanga chuan Union Home Minister Amit Shah leh Tripura Chief Minister Biplab Kumar Deb te chu lehkha thawnin, Mizoram atanga Bru Tripura a raltlante dahnghehna atana Mizote chenna Zampui Tlang leh a chhehvel ruahman tum chu kumin kumtir a Quadripartite Agreement lo neih tawh in a thiltum leh inremna rilru (spirit) a kalh thu leh, helai hmuna Bru dahngheh tumna chu sut turin a hrilh.

January ni 16, 2020 a Home Ministry leh Mizoram leh Tripura sawrkar aiawhte te leh Bru-Reang hnam aiawh ten New Delhi a inremna thuthlung an lo ziah tawhin a thiltum laimu chu tuna Tripura sawrkar hmalakna hian a kalh thu Chief Minister hian a lehkha ah hian a ziak a. Hun rei tawh tak atanga Mizoramah leh Tripura ah pawh Mizote leh Bru hnam inkara inhmuhthiamlohna lo awm fo tawh thin avangin tuna Tripur sawrkar ruahmanna hian boruak duhawmlo a hrinchhuah palh a hlauhawm thu lehkha ah hian a ziak.

January ni 16, 2020 Inremna chu a taka a hlawhtlin ngei theih nan Bru raltlante hi Tripura a Mizo chenna biala dah loh a tul thu Chief Minister chuan ziak in, Tripura Chief Minister chu Zampui area nilo, hmun remchang tha zawkah Bru raltlante awmnghehna tur ruahman ngei turin a ngen a ni.

Mizoram Chief Minister chuan kum 1998-a Mizoram atanga Tripura a Bru raltlante leh Tripura a Mizote inkara boruak awm avangin Mizoten an sahchhuah Sakhan Tlanga Mizo khaw pali (4) lai chu an lo rauhsan tawh thu a tarlang a. Tripura Sawrkar ruahmanna siam chu ngaihtuah that ngai thil a nih thu leh tuna Bru awm nghehna tura an ruahman chu tihtawp a nih theih nan a tul anga inrawlh turin Union Home Minister chu a ngen a ni.

Vawiin khan Tripura Mizo Convention huaihawtin Mizo ramri chin ven hnatlang Zampui Tlang hmun hrang hrangah neih a ni a. Dr. Zairemthiama Pachuau, Gen Secy, Mizo Convention chuan Mizoram Chief Minister Pu Zoramthanga’n an harsatna hriaa Union Home Minister leh Tripura CM hnena Zampui Mizote thlavang hauhna leh an hnaivaia Bru dahngheh tuma rawtna awm mek sut vat tura huaisen taka a rawt chu Tripura Mizote tan a hluin a chungah an lawm hle a ni tih a sawi.