No.1600/2020-2021

Aizawl the 2nd June, 2020 : Chief Minister Pu Zoramthanga chuan vawiin chawhnu khan Zoram Medical College tlawhin thawktute nen an inkawm a. COVID-19 hrileng karah doctor-te chu ral hmatawng an nih thu sawiin Mizoramin kan chhuang hle a ni, a ti.

Nizana COVID-19 vei mi 12 hmuh thar chungchangah Chief Minister chuan "rilru tak chuan eng hunah emaw chuan thleng tura kan rin lawk a ni" a ti a. Chutihrual chuan he hrileng kan hriat tirh ai chuan kan inpuahchahna te tha in, lo dawnsawn dan te pawh kan thiam tawh thu a sawi a. Sample positive an confirm veleh enkawlna mumal takin rang takin an che nghal chu lawmawm a ti a ni. Natna vei te pawh an damchhuah thuai a beisei thu a sawi.

Chief Minister chuan tun dinhmunah chuan mipui hriselna hi kan ngaihpawimawh lian a ni a. COVID-19 doletna atan a mamawh hrang hrang chu sawrkar pawhin ui lovin a tul angin a pek zel thu a sawi a. Mipui pawh tangrualin Covid fund ah puih ngaite puihna turin an thawhkhawm thu a sawi. Chief Minister chuan ZMC tihchangtlun chungchangah tun dinhmunah chuan natna hrileng avangin phai lam atanga endiktu lo kal tur te pawh an lo kal theihloh phah a, mahse chutichung chuan theihtawp chhuahin tlin ang angin hma lak chhunzawm zel a nih tur thu a sawi a ni.

Vawiin hian Chief Minister hi AH&Vety Minister Dr. K. Beichhua leh Veterinary and Fishery Board Vice Chairman Pu C.Lalmuanpuia ten an tawiawm a. ZMC Director Dr. T. Lalhmangaihi, Registrar Dr. Jane Ralte leh ZMC a professor dang te nen an inkawm a ni.