Mizo Zirlai Pawl (MZP)in Haflong Moulhoi-a ZOFEST 2014 a buatsaih chu vawiin khan Chief Minister Pu Lal Thanhawla chuan a hmanpui.
Chief Minister chuan Zofate insuihkhawma rorelna khat hnuaia kan awm hi Pathianin engtik hunah emaw chuan min la pek ngei ka beisei tlat a ni a ti a. Zohnahthlakte hi British awpna tuar nasa ber hnam kan ni tiin, Myanmar-ah te, Bangladesh-ah te leh India ah pawh State hrang hrangah min dah darh a, rorelna khat hnuaia awm ni ila hnam zahawm leh hnam ropui kan ni thei a ni a ti a. Zohnahthlak tawng tam tak zingah Duhlian tawng, Mizo tawng kan tih bawk chauh chu a thiam anih avanga hmang a nih thu sawiin, tawng thiamlo te pawhin an hriatthiam tho ringin, thiamlo an awm anih chuan ngaihdam a dil nghal a. Zohnahthlakte insuihkhawm theihna tura MZP in theihtawp an chhuah lai leh North Cachar Hills Autonomous District Council hruaitu te leh District Administration pawh ina an phurpui em em laia harsatna siama, tharum hial thawh hreh lova invauna nena hmalatu te hi insuihkhawm duhlo tu an ni a, an demawm hle a ni tiin, hnamdang zingah min timualpho hle a ni a ti. Ching tawhlo tura a duhthu a sawi bawk.
Chief Minister chuan Insuihkhawm hi hnamdang tena min zaha min hlauh theihna tur a ni a ti a. Pathianin A chanchintha hril tura Chanchintha hmanga min zawn chhuah kan ni tiin, chanchintha kan hril chhung chu chimralin kan awm lovang a ti a. Insuihkhawm hi Pa hun tiam a thlen hma chu a hlawhtling lovang tiin, Hun tiam a thlen hunah tharum tel lovin rorelna khat hnuaiah kan awm ka ring tlat a ni a ti. Chuvangin tute pawh hian kan unaute hi rilru zau tak pu chunga kan kaihkuah thiam a angai a ni a ti. ZOFEST 2014 hi harsatna leh vauna hnuaia MZP ten huaisen taka hma an lakna chu a chhuanawm hle a ni a ti.
Chief Minister hian Souvenir a tlangzarh nghal bawk a ni.
ZOFEST 2014 hi vawi 6 MZP in an buatsaihna a ni a. Kum 2002 ah Churachanpur-ah, 2004 leh 2006 ah Aizawl ah, 2009 ah Tripura-ah te neih tawh a ni. Vawiina hun hmanah hian hnam incheina hrang hrang Manipur atangin Gangte,Tidim Chin, Chiru, Zo (Zou) leh Simte te, Mizoram atangin Lai, Paihte, Lusei, Pang leh Mara te, Tripura atangin Darlong, Molsom, Chorai te, Bangladesh atangin Bawm, Arunachal Pradesh atangin Shinpho (Kachin) leh Assam (Haflong) atangin Biate, Vaiphei leh Myanmar atangin Chin Halka ten an entir a ni.
Inkhawmah hian chawimawina mi pariatte hnenah hlan a ni a. Pu Lal Thanhawla, Pu L.Keivom IFS (Rtd), Pu Malsawma Colney leh midang panga te an ni.
Inkhawm khualzahawm chu Pu Debojeet Thaosen, Chief Executive Member, NCHAC a ni a, Inkhawm hi Pu Lalsangzuala Ngente, Vice President, MZP GHQ in a kaihruai a ni.
Chief Minister hi NCHADC member ten ropui takin an lo hmuak a, a kal chhung hian traffic zawng zawng an khuahkhirh vek a. Rajiv Bhawanah ropui takin chawimawina an hlan bawk a ni.
