No.1090/2020-2020

Aizawl the 14th May, 2020: Chief Minister Pu Zoramthanga kaihhruaiin vawiin khan COVID-19 avanga Lockdown kalpui zel hi tha an tih leh tih loh chungchangah leh kalpui zel ni ta se, engtia kalpui nge tha ang tih inrawnkhawmna Mizoram Legislative Assembly Conference Hall-ah neih a ni a. Kalkhawm te hian tuna Lockdown kalpui mek chu a hun a tawp hnuah pawh Mizoramah chuan la chhunzawm zel ni se tiin rawtna an siam.

Vawiin inrawnkhawmnaah hian MKHC, NGO Coordination Committee, IMA, MGDA, Mizoram Local Councils Association, All Mizoram Village Councils Association, MJA leh political party hrang hrang aiawhte chuan an ngaihdan te sawi hlawmin, Lockdown kalpui zel chu tha an ti tlang hlawm a. A kalpui zel dan tur a rawtna hrang hrang lut chu State Level Task Force/ State Executive Committee in a lo ngaihtuah chhunzawm ang a, sawrkar laipui atanga thu lo kal tur leh task group hrang hrang te rawtna nen inkaihhruaina thar la siam leh tur a ni.

Chief Minister Pu Zoramthanga chuan Lockdown chhunzawm chu tun kan dinhmunah a la tul hle nia a hriat thu sawiin, Green Zone ni mah ila min hual veltu state leh ram te an la him loh avangin inthlahdul thei kan la nih loh mai piah lamah kan fimkhur zual sauh a tul thu a sawi a. Mi tam tak tan an eizawnna a thuanawp phah avangin economic activities thenkhat chhunzawm thei tura kan inkharkhipna hi thlahdul a ngai a, mahse heng zawng zawngah hian a pawimawh ber chu he natna hrik leng mek hi kai an awm loh a, an inkaidarh loh a ni a ti a. Chief Minister chuan hma kan lak belh zelna turah leh ruahmanna kan siam zelnate kan en remna tur chu mipui him tlanna ni se a ti a ni.

Vawiin thutkhawmah hian ramri a duty chungchangah te, quarantine centre siam belh leh home quarantine chungchanga ngaihdan te, lirthei tlan dan leh state pawn atanga bungrua lo lut thei leh theilo thliar chungchang te, Rapid Antibody Test chungchang leh adangte sawiho a ni a. Kalkhawmte hian state pawn atanga tangkhang lo haw tur te chu an theihtawp a an fimkhur a pawimawh thu te sawiin, Mizoram an lo thlen hunah pawh mipuite kan zavaia kan fimkhur tlan a, doctor-te thurawn ngaipawimawh tlang a mahni himna tura kan theihtawp kan chhuah vek a pawimawh an tih thu an sawi a ni.

State pawn atanga tangkhang lo haw turte chu vawiin thlenga chhinchhiah chinah mi 10,496 an tling tawh a. Mizoram puma quarantine facility kan neih ho zawng zawngah hian mi 4172 an leng a, tunah mi 1,518 an awm mek bawk a. Hemi a nih avang hian a tahtawl zela inhruai hawn a ngai dawn a. Quarantine facility tuna kan neih mek te hian min dawl zawh dawnloh avangin mahni chenna in a chenpui te tawmpui loh a bedroom leh bathroom hran nei inkhunghrang thei tan chuan Home Quarantine tura dilna thehlut a, phalsak an nih tur thu te sawrkar hotute chuan sawiin, a remchanna apianga kohhran hall te pawh quarantine centre a hman a nih theih nan indawr mek a nih thu te an sawi.

Quarantine centre-a awmte chungchangah rawtna hrang hrang awm in, ei leh in tur pawnlam atanga an chhungten an pek chungchanga rawtna awm chu a him chiah em tih finfiah hmasak phawt a tul thu Chief Secretary chuan a sawi. Quarantine Centre a awmte hi an ei leh in tur sawrkarin tumsak in, mi pakhat tan ni khatah Rs.300 man zel niin, ni 14 chhung chuan mi pakhat tan Rs. 4,200 a ni a. Mi 10,496 lo haw turte hi an zavaiin quarantine centre-ah lo awm dawn ta se, an ei leh in man tur ni 14 tan a sen ngai tur zat chu Rs. 4,40,83,200 a ni dawn a ni.

State pawn atanga lo haw tur mi 10,496 zingah Aizawl district mi 4413, Lunglei district ami mi 916, Kolasib district 579, Serchhip district 407, Mamit district 567, Siaha district 1011, Lawngtlai district 877, Champhai district 714, Saitual district 232, Khawzawl district 187 leh Hnahthial district mi 127 an ni. Anni bakah hian India ram pawn a awm mi 330 in report awm bawkin, Cruise Line hrang hranga thawk mi 211 an awm bawk. Heng bakah hian Mizoram mi leh sa nilo, state a tangkhang mek hi mi 547 an awm bawk a ni.

Vawiin inrawnkhawmnaah hian Assembly House Speaker Pu Lalrinliana Sailo, Health Minister Dr. R. Lalthangliana, Home Minister Pu Lalchamliana, Information and Public Relations Minister Pu Lalruatkima, Medical Operational Team Chairman Dr. ZR Thiamsanga te an tel a. Chief Secretary leh Health Department, Home Department, Disaster Management and Rehabilitation Department leh Planning and Programme Implementation Department hotute an tel bawk.