Cheng nuai 185.90 senga siam Laldenga Park Kawmzawl ami chu Chief Minister Pu Lal Thanhawla’n vawiin chawhma dar 11:00AM khan a hawng. Hawnna inkhawm Laldenga Park Kawmzawla neih ah Chief Minister chuan Pu Laldenga Mizo history a a hming a dai ngai tawh lo tur, a pian leh murna khua Pukpui hmun ngei a Park hawn theih a awm chu lawmawm a tih thu a sawi a. Chief Minister chuan he Park hi Lunglei mipui leh a bik takin Pukpui khua ten mahni ta anga en a ngai dawn a, lawmna chang in hriat a pawimawh hle a ni a ti. Pukpui hian hmasawnna in ngah hle a, he hmun pawimawh hrang hrang bakah hian a dang pawh beisei tur engemaw zat a la awm a ni ati. Hei bakah hian hmasawnna leh hmachhawp hrang hrang sawiin inkalpawhna kawngpui ah pawh hma lak zel a ni a, Mamit atanga Lawngtlai chhuak tur kawngpui pawh World Bank te nen inbiak mek a ni a, Lunglei atang Tlabung kawng siamna tur pawh tihfel tawh niin Tender koh mek a ni, a ti. Chief Minister chuan a sawi zel naah ringtu inti si milem be ho tello a kan intodelh thei lo hi thil zahthlak tak a ni a, intodelh tur hian sawrkar ang pawhin kawng hrang hrang a hmalak mek a ni a, leilung hausakna ah pawh Natural gas hmuhchhuah tawh lakchhuah dan tur leh zawn chhunzawm hna chu ngawrh takin kalpui mek a ni a ti. Mizoram chhim lam chu kan chhuahka ber ni turin hmalakna kalpui mek a ni a, Northeast a cheng te tan sumdawnna hmunpui kalkawng a la ni thuai dawn a ni a ti bawk. Chief Minister chuan Pathian in leilung min pek chu sawrkar ringawt ring lovin mimal tinin kan theih tawk ang theuh hmanga thawk zel turin leh thianghlim na kawng a theihtawp chhuah theuh turin kalkhawm te a chah bawk.

Pu P.C. Lalthanliana Minister LAD pawhin thusawiin kum reilote chhung a Park an siam te mi hmingtha te hming a phuah a ni chu lawmawm a tih thu sawi in Laldenga Park pawh hi thil ropui tak ni lo mahse thil hlu tak a ni a, thalai ten nawmchenna atana hmang lova chen nawmna a tan a hmang turin leh thalai te pawhin ruitheih thil tel lova hlimna an hmuh a beisei bawk.

Laldenga Park hmun hi PC Lalduhthlanga Pukpui leh Pu Ralzika Ramthar ten LAD Department hnenah ram an pek ah siam a ni a, a panna kawng hi BCM in an pe ve thung a ni. A hmun zau zawng hi 27 Bigas a ni.

Vawiin hawnna inkhawm hi Pu B.Lalhmingthanga, Secretary LAD in a kaihruai a, Pu Lalchawimawia DLAO, Lunglei in report pe in Pu Joseph Lalhimpuia, Vice Chairman High Powered Committee leh Pu Laldenga fanu Dr. Rinzuali ten thu an sawi bawk. Pu A.Biaklawma, Director, LAD in lawmthu a sawi bawk.