Chief Minister Pu Lal Thanhawla chuan vawiin khan Vanapa Hall-ah Sericulture department buatsaih ‘North East Textile Promotion Scheme leh Workshop on Implementation of Catalytic Development Programme under 12th Plan in Mizoram’ a hawng.

Pu Lal Thanhawla chuan tun Assembly inthlana Mizoram mipui ten chak taka hnehna an pe chu Mizoram mipui chungah lawmthu a sawi hmasa a.

Chief Minister Pu Lal Thanhawla chuan Mizoram mipui zinga tam ber kuthnathawka eizawngtu 70% te chawikan hi sorkar ngaihpawimawh ber a ni tiin, an mahni atang hian hmasawnna leh changtlunna hi kan bul tanna tur a ni a ti a. Kuthnathawktute hamthatna tura hetiang scheme leh workshop buatsaih a ni chu a lawmawm hle a ni a ti.

Sericulture hi eizawnna tha tak a ni tiin, hnathawktute chu tan la thar turin a chah a. NLUP hnuaia line departmentte zinga ti tha ber an ni chu a lawmpui thu a sawi a. Thingtlanga chengte din khawchhuah theihna turin sorkar chuan beihpui a thlak reng a, dikna, taimakna,chhelna leh tumruhna nen kan kal a pawimawh a ni a ti.

Sericulture lama nasa taka hma kan sawn theihna turin Textile Ministry leh Central Silk Board te an inhawn hle thu sawiin, Pu Hawla chuan central sorkar duhsakna kan dawnte hi mahni hnaa kan tui tawk loh avangin sum kan hmuh tur kan hmulo teuh a, a zahthlak hle a ni a ti a. Sorkar hnathawkte chu mahni theuh inbihchian nan hmang turin a chah a ni. Mizoram sorkarah chawlh tam lutuk leh office hun chhung tih tawi tula a hriat thute a sawi a. Ringtu kan nihna hi Pathianni a inkhawmah duh tawk mai lovin kan nitin hnathawhah a lang tur a ni a ti.

Chief Minister hian lehkhabu ‘Cocoon var lian chi khawi dan’ tih a tlangzarh bawk a ni.

Pu P.L.Thanga,IAS (Rtd) pawhin thu sawiin he project hi Rs.20 Crore project anih thu a tarlang a, kum 2014 atang chuan pangngang khawitute tan a chi tha ah intodelh tum a ni a ti a. NLUP hnuaia infrastructure pekah Sericulture department chu a ti tha ber an ni a ti bawk a. Sericulture farmers ten hlawk zawka an tharchhuah an hralh theihna turin Integrated Procurement & Marketing Strategy kum thar 2014 atanga kalpui tum a nih thu a sawi bawk.

Hawnna inkhawmah hian Pu Moncy Isaac, Dy Secretary (Tech), Central Silk Board Hqrs, Bangalore pawhin he scheme chungchang sawifiahna a nei bawk a ni.