Mizoram rawn tlawh mek Bangladesh State Minister, Ministry of Chittagong Hill Tract Pu Dipankar Talukdar chuan tukin zing khan Mizoram Chief Minister Pu Lal Thanhawla chu a chenna inah hmuhin Mizoram leh Bangladesh inkara thawhhona leh sumdawnna chungchang huam zau takin an sawi dun a ni. He meeting-ah hian Trade & Commerce Minister Pu Lalrinliana Sailo leh Principal Secretary Pu L.R. Thanga ten Chief Minister hi an tawiawm a. Bangladesh Minister hi amah rawn zuitu mi pawimawh ten an tawiawm bawk a ni.

Mizoram Chief Minister Pu Lal Thanhawla chuan Bangladesh Minister leh amah tawimawmtute lo lawmin tun hnaia Prime Minister Pu Manmohan Singh nena Bangladesh an tlawh tuma an Prime Minister Pi Sheikh Hasina leh Council of Ministers te nena an meeting hlawhtlin chungchangah lawm thu a hlan bawk a. India nena an thawhhona turah Bangladesh sorkar inhawnna leh hmalakna a fakawm tak zet a ni, a ti. Mizoram kaltlanga Indo-Bangladesh Border Trade hlawhtling tur chuan kawng tha a pawimawh ber thu sawiin Chief Minister chuan Mizoram sorkarin theihtawp a chhuah mek a, Bangladesh pawhin nasa zawka kawng siamthat lamah hma la turin a ngen a ni. Thailand-a a zin tuma an sorkar hotute nena Indo-Bangladesh Trade chungchanga a sawinaah anni pawhin theihtawpa lo thlawp leh tanpui an inhuam thu an hrilh thu Pu Talukdar hi a hriattir a. Ram pahnih thawhdunna tura Pi Sheikh Hasina-in mimal taka a tuipui thinna ah Pu Lal Thanhawla chuan lawmthu a sawi bawk. Mizoram-a hnam tenau zawk - Chakma, Mara leh Lai - ten Autonomous District Council changtlung an neih thu sawiin Pu Lal Thanhawla chuan an bial chhungah thuneihna thui tak pek an nih thu leh sorkar laipui atang pawhin District Council tan a bik taka sum a lo lut thin thu te a hrilh bawk a ni.

Bangladesh State Minister Pu Dipankar Talukdar chuan Border Trade atana thil bawhzui ngai zawng zawngte chu a hmawr an bawk fel tep tawh thu te; tun hnai maiah pawh Tripura state nen insumdawnna an hawn nual tawh thu te bakah Mizorama remna leh muanna tluan tling thlen kawnga Mizoram Chief Minister tha thawh ropui leh entawntlak a tih thu te a sawilang a ni. Mizorama remna siam a nih hnu kum 11-ah an ramah ngei pawh remna thuthlung tha tak ziak a ni ve thei tih sawilangin tunah chuan remna leh muanna boruak hnuaiah Bangladesh pawh nasa takin hmasawnna hmel a hmu chho zel a ni, Pu Talukdar chuan a ti.

Mizoram Trade & Commerce Minister Pu Lalrinliana Sailo pawhin a thil ngaih pawimawh tarlangin Mizoram atanga hatkora tam tham tak Tripura kaltlanga Bangladesh-a thawn luh thin ah pum khatah Rs.4/- zel Bangladesh sorkarin chhiah a lo lak thin chu mimal taka lo hre turin a chah a ni.