Vawiin chawhma dar 11:00 AM khan Chief Minister leh Council of Ministers lak luhna inkhawm ‘Swearing-in-Ceremony’ chu urhsun takin Circular Lawn, Raj Bhawan-ah neih a ni a, Mizoram Larsap Pu Vakkom Purushothaman chuan Chief Minister leh Council of Ministers te hi riawmna thu ‘Oath of Office & Secrecy’ tiam tirin a la lut a ni.

Swearing-in-Ceremony tan remtihna, Chief Secretary Pi L. Tochhawng’n  Larsap a dil hnuin, he inkhawm urhsun tak hi tan a ni a. A hmasa berin  Pu Lal Thanhawla chu Larsap chuan rinawmna thu ‘Oath of  Office & Secrecy’ tiam tirin Chief Minister atan a la lut a. Hemi hnu hian Cabinet Ministers atan Pu R Lalzirliana; Pu R Romawia; Pu Lalsawta; Pu H Rohluna; Pu Zodintluanga; Pu PC Lalthanliana leh Pu John Rotluangliana te chu a mal mal in ‘Oath of Office & Secrecy’ Larsap in a tiam tir hnuin lakluh an ni.

Hemi dawtah hian Ministers of State atan Pu Lal Thanzara; Pu Lalrinmawia Ralte; Pu C Ngunlianchunga leh Dr. B D Chakma te chu a mal mal in rinawmna thu ‘Oath of Office & Secrecy’ Larsap in a tiam tir  hnuin lakluh an ni.

Vawiin Swearing-in-Ceremony-ah hian ex-Chief Minister Pu Zoramthanga; Pu C L Ruala, Lok Sabha MP; AICC Member Pu Eduardo Falerio;  Assam Health Minister Pu Hemanta Biswa Sarma; Minister lo ni tawh engemaw zat; Mizoram Legislative Assembly 7-naah MLA te leh ex-MLA engemaw zat leh Mizoram Sawrkar leh Mizorama Central Sawrkar hotu te an tel a ni.  

Tun tum hi Pu Lal Thanhawla’n tum nga (5) Mizoram Chief Minister dinhmun a luahna tur a ni a, hemi hma hian 1984 –1986 (1^st Term); 1989 –1993 (2^nd Term); 1993 –1998 (3^rd Term); 2008 –2013 (4^th Term) inkar te khan Chief Minister dihmun hi a lo luah tawh a ni.

Chief Minister Pu Lal Thanhawla hi tun Assembly in thlan tiamin, vawi 9 MLA anih na tur a ni.  2013 hma hian 1978, 1979, 1984, 1987, 1989, 1993, 2003 leh 2008 ah te khan MLA atana thlan tlin a lo ni tawh bawk a ni.

Vawiin tlai dar 4:00 PM hian Raj Bhawan-ah Larsap chuan Mizoram Legislative Assembly 7-naah Protem Speaker a la lut dawn a ni.