Vawiin chawhnu khan Mizoram Judicial Service (MJS) trainee-te chuan Chief Minister Pu Lal Thanhawla chu CM's Cabinet Meeting Room-ah an hmu.

Chief Minister chuan MJS Trainee-te chu a lawmpui thu sawiin, Judicial Service mi an nih angin hna an thawh zelna turah dikna ngaihpawimawh a huaisen taka thawk zel turin a chah a. Thufingin "Justice delayed is justice denied" a tih angin, khawtlang that zawkna atan court case tihkhawmuan loh hram a pawimawh thu sawiin, Judiciary a that chuan ram a zahawm a, khawtlang pawhin a that phah a ni, a ti.

Chief Minister chuan Democracy innghahna ban pathum - Legislative, Executive leh Judiciary te chu thawk ho tur annih thu te tarlangin, sualna leh hlemhletna do kawnga ramin hma a sawn leh zual a, mipuiin an chanpual dikna an hmuh theih nan Judiciary chu thuam that a pawimawh thu a sawi a. Mizoramah pawh sawrkarah sum indaihlohna awm mahse chak zawka Judiciary a kal theih nan mamawhna avanga recruitment tih belh dan ngaihtuah zel a nih tur thu a sawi. Trainee-te nena inkawm zel naah Chief Minister chuan Mizorama ruihhlo lam kaihhnawih NDPS case chungchang te a sawipui a: nikum chhunga Mizorama NDPS case Court-a lut zinga 92% bawr vel chu chinfel a nih tawh thu leh, India state hrang hrang zingah Mizoram chu POCSO case chinfel zat tamna ber niin state titha ber zing a mi a nih thin thu report a ni.

Tuna MJS trainee-te hi nikum kum tawp lama MPSC in a lak niin, an vaiin mi 16 an ni a. December thla laihawl a?ang khan training nei tan in, North East Judicial Officers' Training Institute  (NEJOTI) & Judicial Academy, Assam-ah kumin January atang khan thla thum training an neih hnu in Mizorama District Court-ah te  Field Training an nei mek a. MJS inkaihhruaina angin Judicial Officers 16 zinga mi 10 chuan kum nga chin service an luh hmaa an lo practice tawh avangin June thla laihawl hian training an zo dawn a, midang 6 te chu kum khat training tur niin kumin December hian training an zo ang. May ni 13, 2018 hian Trainee te hian NEJOTI-ah training chhunzawm turin Guwahati an pan leh ang a, Delhi Court ah te court kalphung an zirchiang dawn bawk a ni.

Chief Minister hi Press Secretary to Chief Minister Pu L.R. Sailo chuan a tawiawm a ni.