Nimin (27.9.2016) tlai khan Union Minister of State (Independent Charge) Environment, Forest & Climate Change Pu Anil Madhav Dave chuan Chief Minister Pu Lal Thanhawla chu a chenna Bangla ah hmuin inkawm hona tha tak an nei.

Union Minister Pu Anil Madhav Dave chuan Ministry mawhphurhna a lak hnuin India rama state zawng zawngte tlawh tura fehchhuak anih thu leh Mizoram chu state a tlawh hmasak ber anih thu Chief Minister a hrilh a. Khawpuia mihring cheng an pun belh zel a, chuvangin bawlhhlawh sawngbawlna leh tuichhia paihna tur ruahmanna tha tak neih a pawimawh chho dawn a, ruahmanna tha kan neih loh chuan nakin zelah urbanization hian chona lian tak min siamsak dawn a, chuvangin hemi kawnga hian ruahmanna tha leh tlo kan neih a tul a ni, a ti.

Chief Minister Pu Lal Thanhawla chuan NLUP chungchang hrilhin khawvel in a buaipui mek sik leh sa in thlak danglam global warming leh kan chhehvelah boruak environment chhe zel tur venna piah bakah tuihna humhalh te chu NLUP in a huam thu hrilhin UNO lam te pawhin he policy hi tha tiin UNO agency pali ten hmalakna an neih mek thu te a hrilh bawk a. Ei leh bar lamah tualchhung thlai ‘indigenous crops’ kum za tam tak tualchhung miten tangkai taka an hman leh ramhmul damdawi te humhalh leh zirchian chu Union Minister hian a ngaihpawimawh thu sawiin heng thlai tangkai te hi uluk zawka an chanchin zir chian a tul a ni, a ti.

Chief Minister hian Union Minister hi Mizo thil - khumbeu, khiangkawi ipte leh thangchhuah diar te a hlan a ni.