Nimin tlai ah khan Chief Minister Pu Lal Thanhawla a chenna Bungalow ah kawm in Land Custom Station, Zokhawthar tlawh tum Union Minister of Commerce and Industry Pi Nirmala Sitharaman chuan ram dang nena insumdawn tawnna ti changtlung turin a tul apiangah Mizoram sorkar tanpui a inpeih tih a hrilh.

Chief Minister Pu Lal Thanhawla chuan Union Minister hian Myanmar leh Bangladesh nena insumdawn tawnna ti changtlung tura motor kawngpui sial mek anih dante lo hrilhin chak zawka bawhzui turin a ngen bakah Mizoram mipui leh sumdawng ten Border Trade hlawhtlinna an hmuchak tawh a ni tih a lo hrilh a ni. Chief Minister hian Land Custom hi hawntheih turin kum tam tak liamta ah khan sak zawh anih tawh thu leh tunah pawh informal trade liantham tak tak ten helai hmun hi a paltlang tawh a. Commission a nih hun chuan Mizoram economy in nasa taka hmasawnna hmuh dawn thu a sawi a. Pi Nirmala Sitharaman hian tun tum hi Mizoram vawi 3 a rawn tlawhna  a nih thu a sawiin official anga a rawn tlawh hma hian vawi 2 lai a rawn tlawh tawh a ni a ti a. Land Custom Station rawn commission hmasak hi a pawimawh tak zet thu sawiin hemi hnu hian hnathawh tur tam tak hriat belh tur leh bawhzui tur pawh a awm nual tur thu a sawi a. Border Trade Centre te hi tih hlawhtlin zel tum a ni a, Sawrkar laipui chuan Mizoram chu 'Vibrant economy' ah siam a duh a ni a ti.

Chief Minsiter nena an inkawm hnu-a Doordarshan Correspondent zawhna chhangin Union Minister Pi Nirmala Sitharaman chuan Prime Minister in Act East Policy a puan chu Minister zawng zawngten chak takin an bawhzui mek tih a sawi a, hemi bawhzuina kawngah hian hmarchhak bial state te chu an mamawh apiang enpui an ni ang a ti a. Zokhawthar Land Custom Station Building hawn tur chuan insumdawn tawnna huam zau zawka a hawn tur thu sawiin, Mizoram chu sum leh paia a hlawkna teltu tur a ni a ti a, land custom station hawn mai piah lamah Myanmar ram chhunga kawng siam mekte pawh chak zawka thawh anih theihna turin a tul anga nawr zui a ni ang a ti.

Pi Nirmala Sitharaman chuan Mizoram thil dehchhuah theihte pawh tam zawk hai chhuak tura hmalak anih tur thu a sawi a, puan leh a kaihhnawih thil siamchhuah lamah Mizoram chuan hma thlir a nei tha hle a ni a ti a. Mizoram chu tlangram chheng chhe tak anih avangin inkal pawhna ti changtlung tura hmalak a tul a, chumi rualin mizo thalai, thiamna sang tak tak nei ten an thiamna Mizoram tana tangkai taka an hman theihna turin chhawr tlak ni tura buatsaih an ngai a ni a ti. Pi Nirmala Sitharaman chuan ram dang nena insumdawn tawnna kawngah training mumal tak buatsaih a nih chuan hlawkna nasa tak Mizoram chuan a tel thei dawn tih a sawi a, hemi kawngah hian Directorate General of Foreign Trade (DGFT) emaw Indian Institute of Foreign Trade ten Mizoram ah ngei training an buatsaih theihna tura hmalak a tum thu a sawi a ni.

Nimin tlai vek khan State Guest House ah Union Minister of State pual hian Trade & Commerce Minister Pu H.Rohluna'n  Cultural Programme a buatsaih a. He hunah hian  Art & Culture Minister Pu R. Romawia, Parliamentary Secretary Pu Joseph Lalhimpuia, Pu Lalrinliana Sailo, MLA leh sawmbik te pawh an tel a ni.