2635/2022-2023

Aizawl, 12.11.2022: Chief Minister Pu Zoramthanga chuan vawiin khan Lengpui Airport Terminal ah Union Minister of State for Finance Dr. Bhagwat Karad nen inkawmin, Mizorama hmalakna pawimawh chungchangte an sawi dun. Chief Minister hi Guwahati-a meeting pawimawh ah telin vawiin khan a lo let a. Union MoS hi Mamit ah kalin, Delhi pan in vawiin khan Mizoram a chhuahsan a ni.

Chief Minister leh Minister Dr. Bhagwat Karad chuan Mamit leh Mizoram pum a mipui hriselna enkawlna chungchang sawiin, ram hmasawnna leh health care a kal dun dan leh tih changtlun zawk nan mamawhna te an sawi dun a. Mizoram medical college neih chhun enkawl zui zel dan tur te pawh an sawi kai a. Primary Health Centre-te tihchangtlun a, thuam that zel pawimawh a tih thu te MoS hian a sawi bawk. Heng bakah hian Mizoram economy hmasawnna atana potential a neih – leilung nghenga eizawnna chu a hlawkna tak tak haichhuah tur chuan a panna kawng link road tha a tul thu te an sawi dun bawk.

Chief Minister hian Lengpui Airport Terminal thuam that hna thawh mek chu Principal Consultant, Aviation Wing leh PWD hotute nen an enfiah bawk a ni.

Guwahati ah National Highway hnathawh chungchang meeting-ah Chief Minister Pu Zoramthanga hi a tel a. He meeting kaihruaitu Union Minister of Road Transport & Highway Pu Nitin Gadkari chuan nimin tlai khan Mizoram tan kawng siamna tur project hrang hrang tan cheng vaibelchhe 6,664 dah a nih tur thu a puang a. Heng project hrang hrang (belhkhawmin km 204) zingah hian Zorinpui-Longmasu inkar kawng, Vairengte-Sairang kawng, Aizawl bypass road (leiverh 2.5 a thui awm telna tur) te, Seling – Tuivai inkar kawng siamna tur te a tel a ni.

Vawiin hian Lunglei South bialtu MLA Pu K. Pachhunga, Secretary to CM Pu K. Lalthawmmawia, Finance Commissioner Pu Vanlal Chhuanga leh official dangte an tel bawk a ni.