Vawiin khan Chief Minister Pu Lal Thanhawla’n Sawrkar Laipuia kawlphetha enkawltu Minister of State (Independent Charge) for Power, Coal, New and Renewable Energy and Mines  Pu Piyush Goyal chu a Pisa ah hmuin Mizoram kawlphetha dinhmun chungchangte, kawlphetha tihchangtlunna kawnga Mizoram mamawhte leh nizung hmanga kawlphetha siamna tur bun chungchangte a sawipui a, Power Minister hian Mizoram mamawhte a hmunah en turin High Level Delegation a tirh tur thu Chief Minister a hrilh a ni. 

Chief Minister chuan MW 24 pechhuak thei Turini Small Hydel Project chungchang a sawinaah he project hi State project anga kalpui anih theih nan theihtawp chhuahpui turin Power Minister a ngen a. Tunah Ministry in Small Hydel Project atana subsidy an pek mek chu a tlem tih sawiin hei hi MW  khat zel angin pek nise tih a rawt a, Power Minister chuan hei hi Ministry a lo enzui tur thu a hrilh. 

Chief Minister chuan nizung hmanga kawlphetha chu kawlphetha thianghlim anih avangin leh Mizoramin ni eng a hmuh that avangte in hei hi a ngaipawimawh a, Solar Power Policy pawh hman thei turin Mizoram Sawrkarin a ruahman tawh tih a sawi a. JAICA tanpuinain Thenzawl ah MW 10 pechhuak thei Solar PV Plant siam anih theih nan project hi Ministry of New & Renewable Energy ah thehluh ani tawh tih sawiin project tan vat anih theih nan a tul te chu Ministry lamin JAICA ah buaipui sak turin a ngen a. Hemi bakah hian MW 10 pechhuak theih Solar Power Plant dang pawh hmun remchanga Solar Power Policy zulzuiin Sawrkarin bun a duh thu sawiin hemi kawngah pawh theihtawp chhuahpui turin a ngen bawk a. Myanmar nena insumdawntawnna kawngah thil a awlsam zawk nan Myanmar lamah ramri depa awm insumdawn tawnna khua (trading point) la eng lo te tih en nan Mizoram Sawrkar in cross border electrification a kalpui duh tih pawh Minister a hrilh a, Minister hian a theih dan tur kawng a zawnpui tur thu a hrilh a ni.