No.2466/2021-2022

Aizawl, 4th October, 2021: Kar kal ta inrinni, 2nd October, 2021 chawhnu khan Chief Minister Pu Zoramthanga tirhin Mizoram MP te pahnih, Pu C.Lalrosanga MP(Lok Sabha), Pu K.Vanlalvena MP( Rajya Sabha) leh Pu Ro sangzuala OSD to Chief Minister ten Union Minister of DoNER, Pu G.Kishan Reddy chu a chenna inah an hmu a. Mizoram mamawh thil pawimawh chi hrang hrang te an thlen a ni.

Mizoram Team te chuan Covid hripuiin Mizoram chu India ram hmun dangte aia nasa zawka a luhchilh mek dan leh thenawm ram Myanmar buaina avanga nitin raltlan an pun mek zel thute Minister hnenah hian an thlen a. Mizoram CM ruahmanna anga Bamboo Road Mizoram chhungah a tam thei ang ber laih a tul tawh thu pawh an thlen bawk a.

DoNER Minister Pu Kishan Reddy a chuan Prime Minister aiawhin Mizoram Chief Minister tirh te chu a lo dawngsawng tih sawiin Covid dona atan leh District hrang hrang hospital te tih changtlunna atana hman turin cheng vaibelchhe 38 pek thuai a nih tur thu a sawi a. Mizoramah Oxygen plant pahnih bun a nih tur thu leh Mizorama Covid do tu te tanpui turin Central team tirh thuai an ni ang, a ti bawk a. Myanmar atanga inhumhimna zawnga Mizorama châm mekte pawh covid vaccine pek vek tur an nih thu leh hei hi anmahni Myanmar mite tan chauh ni lovin India khua leh tuite himna atan pawh a pawimawh thu a sawi.

DoNER Minister chuan Mizoram hmasawnna atana Bamboo road emaw Economic road emaw siam chu thil tul nia a hriat thu leh Mizoram CM nena an sawi dun tur thu Mizoram aiawha amah dawrtu te chu a lo hrilh bawk a ni.

Attachment

  • Loading attachment...