NEC meeting ah hian meeting hmasa thurel leh bawhzui dante ennawn a niin hmarchhak Governor leh Chief Minister hrang hrang ten thu an sawi a. Mizoram Chief Minister Pu Lal Thanhawla pawhin he meetingah hian thu sawiin hmarchhak bial hmasawnna tura DoNER Ministry leh NEC hmalak hrang hrang te chu lawmawm a tih thu a tarlang a. Hmarchhak bial tana ruahmanna te hlawhtling taka ti puitling turin Task Force rawtna zulzuia ngaihtuahna hman a tul tih sawiin Pu Hawla chuan NEC kaihhruaina dan thar chu hmarchhak pumpui dinhmun chawikan nan tha mah se, state mal project thenkhat pawimawh bik te chu he kaihhruaina dan hian a huam tel a tul thu he meetingah hian a thlen a. NLCPR leh NEC sum hmanga special category state te chhawmdawlna tur chungchangah tlangram leh phai zawla chengte chu hrut rual mai lovin Task Force rawtna angin tlangram bik tana hmasawnna ruhrel din nan central sorkar chuan sum tam zawk dah se tih a rawt bawk a. Hmarchhak hmasawnna tura central sorkar sum 10% dah thin chu a kalpui danah state sorkar te chu ruahmanna siamnaah telh an ni lo chu sawiselin Pu Hawla chuan hemi sum hi hmarchhak bial nena inkungkaih lo leh hmasawnna lam hawilo hna thawh nan hman ni tawh loh se tiin a thlen a. Awmze nei zawka NEC in hna a thawh theih nan Planning Commission nena an inkar mumal taka thliar fel chu a pawimawh tih sawiin NEC, NLCPR, CSS leh Annual Plan hnuaia hmalakna hrang hrang te pawh awmze nei zawka thliar fel leh kalpui tlan dan tur ngaihtuah a tul thu a sawi.

NEC Sectoral Summit vawi 6-na a Rail Connectivity chungchang sawihona ah hmarchhak state khawpui zawng zawng rel kawnga thlun zawm vek tura lo rel tawh chu tarlangin Pu Hawla chuan India sorkar Look East Policy zulzuiin rail kawng hi Kolodyne lui chhun thleng tura ruahman a pawimawh thu he meetingah hian a thlen bawk a. Vision NER 2020 chu a taka ti puitling turin NEC chu sum tam zawka thuam a tul thu leh 11th Plan tana vaibelchhe 7,394 dah chu NEC tan Regional Planning Body hna thawk turin beitham a tih thu pawh he meetingah hian a sawi bawk a ni.