Vawiin khan Chief Minister Pu Lal Thanhawla'n New Secretariat Complex-a Directorate of Science and Technology Office Building sak thar a hawng a. Hawnna inkhawmah hian State Planning Board Vice Chairman Pu H.Liansailova, Minister pahnih, Pu P.C.Lalthanliana leh Pu Ngunlianchunga, Parliamentary Secretary pathum - Pu K.S. Thanga, Pu K.Lalrinthanga leh Pu H.Zothangliana te, MZU Vice Chancellor Prof. R. Lalthantluanga an tel a ni.

Chief Minister Pu Lalthanhawla chuan Science leh Technology hi tunlai khawvelah a thang zel a, ramdangte ke pen ruala ke kan pen theih nan science thiamna kan hman tangkai zel a ngai a ti a. Science leh Technology pawimawh zia te sawiin Ram Danpui Article 51A a khua leh tui te chu Science leh a hnathawh tana theihtawp chhuah tur thu a dah hian ramin science leh technology a dahsan zia a tilang a ni, a ti a. Science leh Technology tel lovin hmasawnna a tleng thei lova, tunlai khawvel intlansiakna ber a ni tawh hial a ni tiin Mizo thangtharte zinga scientist leh mathematicians tia koh theih mithiam an awm chu lawmawm a tih thu a sawi.

Pu Lal Thanhawla chuan zirna lamah hma sawn hle mah ila Sawrkar hna in min daih dawn lova chuvangin Science leh Technology thiamna hman tangkai dante ngaihtuahin mahni kea din tumin self employment lam te kan hawi a pawimawh tawh a, chutiang zawnga inbuatsaih a ngai a ni, a ti a. Science & Technology Department hnathawh dante sawiin Mizoram Science Technology & Innovation Council (MISTIC) leh Mizoram State Remote Sensing Application Centre (MIRSAC) te chu mipui leh sawrkarin kan chhawr tangkai tawh hle a ni, a ti. Department leh a hnuaia agency-a thawkte chu ram hmasawnna atana tunlai thiamna hmanna kawnga theihtawp chhuah turin a chah a ni.

Building thar hawnna chu Deppartment tan rahbi thar tukna ni pawimawh tak anih thusawiin Chief Minister chuan Department in office thar changtlung tak an nei chu a lawmpui thu a sawi a. He Office building atang ngei hian Science leh Technology thiamna hmanga Mizoram hmasawnna tur an buatsaih zel theih ka beisei a, ka chah duh nghal bawk a ni a ti.

Hawnna inkhawma thusawitu dang Pu H.Liansailova, Vice Chairman, State Planning Board chuan tunlai khawvel hmasawnna hi hmasawnna tluantling, thang leh thar zelte tana chhen fakawm hnutchhiah a ngai a. Hemi atan hian scientific temper leh approach a tul a. Kan hmasawnna hi thil thar hmuhchhuah ai mahin thil awmsa changtlung leh tha zawka buatsaih thiamna, innovation a ni mah tawh zawk a, helamah hian tan kan lak nasat deuh a ngai dawn a ni a ti.

PWD Chief Engineer (Building) Er Lalmuankima Henry chuan technical report a pe a. Directorate of Science & Technology Building hi SPA atanga sum hmuh hmanga sak a ni a. He building hi Mizopa chhiar danin basement te nen chhawng ruk a ni a, a zau zawng hi 2178.98 sq.m (23,445 sq ft) a ni a, kum hnih chhunga sak zawh tura ruahman a nih laiin, kum khat leh a chanve tling lovah sak zawh a ni a.

He building sakna atan hian cheng nuai 623.82 sen a ni a ti. Building satu hi Pu Sangpuia, Chandmari a ni. He Building hawnna inkhawm kaihruaitu Dr. C.Vanlalramsanga, Planning Secretary (Science & Technology) chuan building thar hawn hi Mizoram a Science & Technology tan chuan mel lung pawimawh tak a ni a thusawiin hemi atana theihtawp chhuahtu Sawrkar leh Official zawng zawngte chungah lawmthu a sawi. He building-ah hian Science & Technology a Officer leh Staff te bakah he Directorate hnuaia Mizoram Remote Sensing Application Centre (MIRSAC) leh Mizoram Science, Technology & Innovation Council (MISTIC) a Officer leh Staff te an awm khawm vek tur thu a sawi bawk.

Dr R.K.Lallianthanga, Chief Scientific Officer, Directorate of Science & Technology in lawmthu sawiin hun a titawp a ni.

Vawiina Building thar hawnna pualin kar hmasaa Mizoram Science Congress hmasa ber neiha Exhibition a lawmman la te model leh Mizo innovators thenkhat ten an khawl an siamchhuah pholan a ni a, hengte hi Chief Minister Pu Lal Thanhawla leh he hunah te mi pawimawh kal ten an tlawhkual a ni.