Vawiin chawhnu khan Mizoram Chief Minister Pu Lal Thanhawla chuan Mizoram sawrkar hnuaia Special Planning Assistance(SPA) sum, Rs.953.28 lakh senga sak, E-in-C Office building of Power & Electricity Department, New Secretariat Complex chu a hawng a. Kawlpetha hehlo zawka siam electric bungraw lei theihna tura duan 'Ujala & Pavan Schemes' pawh a tlangzarh nghal a ni.

Chief Minister Pu Lal Thanhawla chuan hmasawnna ruhrel zawng zawng deuhthaw in a mamawh, Kawlpetha pekchhuak leh enkawl hna chak zawka thawh a nih theihna tura E-in-C Office building of Power & Electricity Department, New Secretariat Complex sakpum a lo ni leh ta chu Mizoram hmasawnna mellung thar phunbelhna a ni a ti. Contract a that telh telh thu sawiin lawmawm a tih thu a sawi a; engineer ten an hnuaia hnathawk te an la hrual deuh erawh a tul thu sawiin chu workmanship tha taka sawrkar in sum tam tak senga hma a lakna te puitlin zel a pawimawh a ni a ti a. Contract duh si leh hralhchhawn leh ching te chuan sim se a duh thu sawiin chutiang tih ching te chu ram leh hnam hmelma an ni a ti.

Chief Minister Pu Lal Thanhawla chuan hunreilote chhunga peihfel tur, Relkawng siam mek leh state ramri hrula Trade & Commerce gateway siam mek te chuan hna tam tak leh sumdawnna tamtak a siam tur thu sawiin power & Electricity mamawhna nasa taka a pun tur thu a sawi a. Power hnianghnar a awm theih nan kawlpetha siamchhuah kawngah te bakah, nizung chakna te leh thli chakna hmanga power siamchhuah kawngah sawrkarin nasa takin tan a la mek zel a ni a ti. Mizoram ramri hrula Trade & Commerce gateway pawimawhna te state pawnlammi ten an hre zawk leh a puitlin hun an nghakhlel zawk chu Mizo mipuite inenfiahna tur ni se a duh thu a sawi a. Chief Minister chuan khawtlang ang te, hnam ang te, hnathiamna peipun ang zawng pawha Mizo te lo inpeih lawk leh thanharh a hun tak zet tih a sawi a. Rilru put hmang thalo tam tak kuttling lova sum lak, diklo taka project tibuai zawnga compensation phut te, thatchhiat leh thawhhreh neih te chu hnam hmasawnna ti thuanawm tu leh Mizoram than ti thu tu a nih thu tarlangin fimkhur a tul a ti a. Mizoram chhehvela hnamdang nuai chuang aia tam mah Mizoramah hnathawk an awm chu pawi a tih thu sawiin Mizoram sum vaibelchhe tam tak Mizoram pawnah a kalliam loh nan thalai ten thawhhreh neih bansana thawh theihvek duhna rilru an put a tul tawh takzet chu Chief Minister chuan a tarlang.

NLUP chu leh NEDP chu sawrkar flagship programme a ni a, sawrkar mi leh sa chuan Line Department hnuaiah thawk lo pawh nihse a hriatbel hle a ngai a ni a ti a. NEDP hmalakna thar in NLUP hlawhtlinpuitute tihchak an nih tur thu leh NLUP hmalakna a chhawmdawl chhunzawm tul te pawh chhawmdawl an nih tur thu a sawi a. NEDP hnuaiah mi thahnem ngai, tanlak nachang hria leh hlawhtlin ngei tuma beitute te puih an nih tur thu sawiin NEPD chu 'tang te tanpuina' a nih thu a tarlang. Chief Minister chuan ranvulh leh sawrkar hmalakna thenkhat te pawh thingtlangmi te chauh sawihmuh a nih tawh loh tur thu leh Mizoram a awmthei deuh leh hausa deuh te pawh state in economic-a hma a sawn theih nan sawrkar hmalakna ah te sawm an ni ang a ti a ni.

E-in-C Office building of Power & Electricity Department hawnnaah hian Er.L.Pachuau, E-in-C, P&E chuan Power & Electricity Department hmalakna leh hmachhawp te sawina hun a hmanga. Mizoram in kawlpetha kan mamawhna a punzual thu sawiin Gas van lai leh Christmas hunlai phei chuan 112 Mw te a hman thin thu tarlangin mipui ten kawlpetha renchem thiam leh kawlpetha hehlo electric hmanrua te hman intih hmuh a pawimawh thu a tarlang. Mizoram in electric hrui thlunkualna leh pekchhawnna ah kawlpetha a neih 19.4% lai hlauh a nih thu sawiin current hloh chhanah transformer hlat lutuk electric thirhluilian thlun te, bungraw hlui tawh vang te leh mi thenkhat current pawhruk vang te niin a sawi a. P&E Department chuan current hloh chu tihreh tuma theihtawpa tan a lak mek thu a sawi a; current hloh te chinfel a nih chuan P&E revenue hmuh pawh nasa taka a pun tur thu a sawi.

E-in-C Er. L.Pachuau chuan 100% Electrification Mizoram in a neih theih nan thingtlang khaw 29 chiah electric hruia thunzawm tur an neih tawh thu sawiin P&E department in a bawhzui mek tih a tarlang. E-in-C Office building of Power & Electricity Department sak chungchanga Technical Report chu Er.Lalmuankima Henry, Chief Engineer, Buildings, PWD chuan a pe a. Technical Report a tarlan a nih ang chuan E-in-C Office building sak hna hi 3rd April, 2013 ah tan niin 28th November, 2015 khan sak zawh a ni a. He building ah hian Basement-III, Basement-II, Basement-I, Ground Floor leh First floor te a awm; he building pumpui lenzawng chu 4386.23 square metre niin a chung zawnga sakbelh theih tura duan a ni.

P&E Statistics in a tarlan dan chuan Mizoram in 132 kV sub- Station 8, 33kV 52 leh transformer(DTs) 1882 a hmang mek a. 132Kv hruipui hi 728.96 Km a thui thlun a ni a, 33kV hrui 1041.06 Km, 11kV hrui 4478.51Km leh LT hrui 3067.08Km a thui te zam a ni. Financial Year 2015-16 chhung khan Mizoram in kawlpetha 338.875MU a hmang a, sum Rs 165.9685 crore a thawkchhuak bawk a ni.

Chief Minister Pu Lal Thanhawla'n a tlangzarh tak, UJALA leh PA VAN Programme hi Kawlphetha renchem kawnga Sorkar laipui hmalakna pawimawh tak niin, Mizoram puma Electric consumer ten renchem zawka kawlphetha an hman theihna tur atana duan a ni. He Programme hnuaiah hian electric consumer-ten electric bulb, tube leh fan te tha zawk leh tlo zawk chu man tlawm takin an lei thei dawn a. A lei turte hian Electric Bill pekna hnuhnung ber kengin 9W LED bulb Rs 85.00, 50W Fan Rs 1,150.00 leh 18W LED tube Rs 230.00 chauhin Mizoram hmun hrang hranga Electric Bill pekna Counter-ah te vawiin atangin a lei theih dawn a ni. Tun turn atana hralh chhuah tura ruahmante chu LED bulb 2,00,000, LED tube 20,000 leh fan 10,000 a ni. LED tube hi kalkawngah a thang mek a, a lo thlen thuai beisei a ni.

E-in-C Office building of Power & Electricity Department, New Secretariat Complex hawnna ah hian PHED Minister Pu Zodintluanga, Fisheries Minister Dr.BD Chakma, Pu K.Lalrinthanga, Parliamentary Secretary, Horti, etc., leh Pu Chalrosanga Ralte, MLA te pawh an tel a ni.