Chief Minister Pu Lal Thanhawla chuan sorkar hnathawh dan zawi lutuk leh discipline awm lo lutuk siam tha turin khauh taka hmalak a ni ang, a ti. Kolasib a sorkar department hrang hrang hotute kokhawmin Kolasib DC Conference Hall ah he thu hi a sawi a. Pu Lal Thanhawla chuan sorkarna an chelh phat atangin hnathawh dan dul lutuk inthununna tha lo leh hun vawn dik kawnga inthlahdahna namenlo siamtha tura an beih hnuah a hlawhtlinna engemaw chen hmu tawh mahse tanlak a la ngai hle a ni, a ti a. Hemi chungchang hi sorkar Secretary te pawh a sawipui thu leh file kal chelh khawtlai thinte lakah chuan dan lekkawh anih dawn thu pawh a sawi a ni.

Pu Hawla chuan Department hotute chu party a rinawm tum buai lo tur leh sorkar laka rinawm mai turin a chah a. Mipui tana hnathawhna sum te chu lo ei sak a thiang lo a, Mizoten a huho thil kan ngaihsan avang leh inthliarna awm lo (classless society) kan kalpui tlat avangin kan khawtlangah discipline a ti chhe zo a ni tiin a nei loin a neite dinhmun ban ve talh kan tum pawh hi kan sim a hun tawh a ni a ti. Langtlang sorkar siam tura sorkar in theih tawp a chhuahna chuan rah duhawm chhuah zelin corruption pawh nasa takin a kimki tawh a ni a ti a. Mizoram mamawh leh thawhchhuah a in phu loh em avangin tan kan lak hle a hun a ni, Chief Minister chuan a ti a. Kan sum dinhmun ti tha turin sorkar officer ten kan thiamna kan hman a tul a. Department tin ten thawhhona tha engkawng pawhin kan neih a ngai a ni, a ti.

Mizo ten kan rilru put hmang kan siam a ngai a. Sorkar hmasaa Tuirial Hydel Project siam tur compesation uchuak avanga tlawlh kha thawh zawh nise chu Mizoram in power kham khawp kan nei tawh ngei ang a ti. Sorkar hnathawk te chu a taka sorkar chelh reng tute an nih avangin rinawm leh hnam hmangaih taka thawk turin Pu Hawla chuan a chah a ni.

Department hotute kalkhawmna hun hi Kolasib DC Pi Niharika Rai IAS in a kaihruai a, Pu Lalrinliana Sailo, H & FW Minister; Pu P.C. Zoram Sangliana, Transport Minister; Pu P.C. Lalthanliana, LAD Minister leh Pu Madhur Verma IPS, Kolasib SP ten an tawiawm a ni.