Vawiin chawhnu hian Chief Minister Pu Lal Thanhawla chuan Serchhip District PRC Auditorium-ah Serchhip RD Block huam chhung khaw hrang hrang atanga Mizoram Rural Housing Scheme 2017-18 dawng tura thlan te hnenah Rangva a sem.

Rangva semna inkhawmah hian Pu Lal Thanhawla chuan, kum 1989 chho atangin sawrkar chuan a mamawhtu, rahbi tuk sak ngai chhungkuate hnenah rangva a lo sem tan tawh a. Tin, NLUP pawh a mamawhtu, mi khaichhuah ngai nia kan hriatte hnenah kan lo pe tawh thin a. Vawiin thlengin chu tanpuina chu he sawrkar hian a la kalpui zel a ni. Tin, heng tanpuina te hi kan sem ve ringawt a ni hran lova, a mamawhtu, rahbi tuk sak ngai tak nia kan hriatte kan tanpuiin kan tuamhlawm thin zawk a ni. Hman atanga vawiin thlengin heng kan intanpuina te dik taka hmangtute hi chu an awhawm tlang viau a ni. Mi tam tak mahni ta ngei ngei pawh eiru duh kana wm thin hi a pawi thin hle a. Vawiina Rural Housing Scheme 2017-18 atanga rangva dawngtute pawhin a nihna ang taka hmanga, tangkai taka lo hmang turin ka ngen che u a ni, a ti. Chief Minister chuan, ramin hma a sawnna kawngah mitinin mahni tawkah mawhphurhna kan neih vek thu sawiin, mahni hna theuh theihtawp chhuaha kan thawh hian mahni ngei hi kan lawm a, Lalpa kan chawimawi tihna a ni a, a hlawkna chu ramin a lo tel thin a ni, a ti bawk. Hengte bakah hian NLUP leh NEDP atanga kan ramin hmasawnna hmel a hmuh nasat dan te, NLUP chu India rama State thang duang berte zinga mia min hlangkaitu a nih dan leh NEDP pawh a that em avanga NE State dangte chu ti ve vek tura tih an nih thu te a tarlang bawk a ni. Chief Minister hian he hun bikah hian a dawng tura thlan chhungkaw pathum hnenah Rangva hi a hlana, midangte chuan BDO Serchhip Office atangin an lachhuak zui ve tawh dawn a ni.

Rural Housing Scheme Rangva semna inkhawm hi Serchhip BDO Pu Vanlalhmachhuana, MCS chuan a kaihruai a. He Scheme hnuaiah hian 2017-18 ah Serchhip Block huam chhung Village Council 39 atangin chhungkaw 263 ten Rangva Bundle 4 theuh, a vaiin Bundle 1052 an pek chhuah tur thu a sawi a. Chutihlaiin a Scheme hian a dawngtu turte chu 10% lo tum ve tura a phut angin a dawngtute hian Rs. 1920 theuh an lo thawh ve a tul thu a tarlang bawk.  Pu Vanlalhmachhuana chuan, kumin June thlaah CM Rural Housing Scheme atangin Serchhip Block chhungah chhungkaw 160 te chu in sak tanpuina Rs. 50,000 theuh pek an lo ni tawh a, vawiina Mizoram Rural Housing Scheme atangin Serchhip Block ah chhungkaw 263 te rangva pek an ni leh a, Serchhip Block kan vanneiin bialtu leh kab Chief Minister Pu Lal Thanhawla chungah hian kan lawm hle a ni, a ti bawk.