3479/2024-2025

Khawzawl, dated 11th December 2024: Vawiin chawhnu dar 2 khan Hon'ble Chief Minister Pu Lalduhoma'n Khawzawl district a Excise & Narcotics Station thar a hawng a, a hawnna programme-ah khuallian niin hun a hmang chhunzawm. Excise & Narcotics Department Minister, Pu Lalnghinglova Hmar chuan khual zahawm niin a tel pui a ni.

CM Pu Lalduhoma chuan thu sawiin Khawzawla seilian a ni tih sawiin Khawzawl a awm laia thil awm dan leh a thil tawn te a sawi a. Minister Pu Lalnghinglova Hmar chu ruihhlo do chungchanga a thawh that avangin a fak a, department pawh an vannei a tih thu a sawiin year of consolidation laia excise office hawn theih a nih hi lawmawm a tih thu a sawi. Thailate'n ruihhlo leh a kaihhnawih thil vanga an tuar nasat em avangin a ngaih pawimawh thu a sawi a, Jail leh court te pawh hmachhawp tur a nih thu a sawi a, home leh jail atanga ruihhlo ngawlvei chhuak te an tluk leh tawh loh nana chhawmdawlna leh tanpuina pek an tum thu a sawi bawk. Heng home a awm mek te'n eizawnna an neih theih nana inzirtirna pek an ngaihtuah mek thu a sawi a, Hand Holding Policy hnuaiah pawh heng ho hi an ngaih pawimawh tum thu a sawi bawk. NGO te nena ruihhlo dona kawngah thawhhona tha taka an neihpui zel theih avangin lawmthu a sawi a, rilru tha leh thianghlim nena thawhpui zel turin a sawm bawk. Sawrkar hnathawk tha tawk lo leh thawk mumal lo te special pension hmanga chawlh tir an tum thu a sawi a, hotute pawh office kalphungah khauh turin a chah a ni. Khawzawl khuaa tlangval leh mipa te khawtlanga zu rui an tam hi pawi a tih thu a sawi a, ti reh turin a fuih a, kohhran leh khawtlang te tang turin a fuih bawk a ni. Ruihhlo do chungchanga sawi tur leh tanpuina mamawh apiang chu sawi zel turin sawrkar hnathawk te leh khawtlang hruaitute a hrilh a, he kawngah hian excise station thar hi a tangkai ngei nan duhsakna a hlan bawk a ni.

Minister Pu Lalnghinglova Hmar chuan Khawzawl district-in a mamawh em em Excise office an nei thei hi lawmawm a ti a, CM Pu Lalduhoma leh hemi hawn a nih theih nana thawk zawng zawng te hnenah lawmthu a sawi a. Excise department hnuaiah inspector te, sub inspector te leh post dang hrang hrang siam tawh niin siam belh zel tum a nih thu a sawi a, lirthei pawh an neih belh zel thu a sawi bawk. Excise office hawn thara thawk zawng zawng te entawn tlak ni turin a fuih a, Khawzawl mipuite pawh tha taka thawh puia boruak tha lo neih pui turin a fuih bawk a. Khawzawl district ruihhlo buaina a hriat thu a sawi a, an hman tangkai ngei theih nan duhsakna a hlan a ni. Minister Pu Lalnghinglova Hmar hian Khawzawl Station a Inspector hnenah hian sum fai a hlan bawk a ni.

He hun hi Excise & Narcotics Department Secretary, Pu Lalramsanga Sailo, IRS chuan a kaihruai a, Pu Z. Lalhmangaiha, Commissioner, Excise & Narcotics Department chuan an department hna kaldan te, an hmalakna te leh an mawhphurhna chungchang report a pe a ni. Khawzawl DC, Pu K. Vanlalthiana'n lawmthu sawina hun a hmang bawk a ni.

Hawnna programme zawh hian CM Pu Lalduhoma leh Minister Pu Lalnghinglova Hmar chu Ruihhlo Do chungchang meeting nei turin Khawzawl DC Office an pan nghal a ni.