1207/2026-2027

Lunglei, 2026 Nikir thla ni 26: Vawiin khan Mizoram Chief Minister & Lunglei High Powered Committee (HPC) Chairman Pu Lalduhoma chuan Lungleia C. Ṭhuamluaia Mualah Lunglei HPC sponsor-a Lunglei District Football Association (LDFA) te'n khua leh khua/veng leh veng inelna, inter-village football tournament an buatsaih, 15th HPC Cup 2026 hmawr bawkna hun chu Khuallian niin a hmanpui.

15th HPC Cup 2026 hmawr bawkna inkhawm tawi buatsaihah Khuallian Pu Lalduhoma chuan Lunglei chu tun hma aṭanga "Thluak tamna hmun" tih ṭhin, ram hruaitu ropui tak tak te, thu leh hlaa mi langsar tak tak te, thiamna lama mi chhuanawm tak tak te, infiamna huangah pawh mi hlawhtling tak tak leh zaithiam tam tak hring chhuaktu a nih thu sawiin, Lunglei chuan kum 1983-a din tawh, Lunglei District Football Association ṭha tak an neih avangin hman ata vawiin thlengin inkhel thiam pawh an ngah ṭhin tih a sawi a. Lunglei chu hranghlui inkhel thiam tak tak te, professional football-a Mizote hmahruaitu te, Mizoram mai ni lo, India football chanchina hming dai tawh ngai lo tur player ṭha tak tak te leh tun dinhmuna India football-a hming langsarte zik chhuahna hmun a nih thu sawiin, tuna Indian Super League leh I-League-a Mizo player 68 vel zinga 13 chu Lunglei tlangval an ni tih a tar lang a. Football lama Lunglei District-in hma a sawn chhan chu Lunglei DFA leh HPC Cup vang tih theih a nih thu a sawi.

Chief Minister & HPC Chairman chuan HPC Cup chu kum 2011 aṭanga kalpui ṭan a nih thu leh COVID-19 vanga kum 2020-a chawlh zauh tih loh chu kum tin khelh a nih thu sawiin, professional ni tura player naupang zawkte inpho chhuahna hmun a nih avangin ngaihhlut tlak a nih thu a sawi a. HPC Cup-a che ṭha player naupang deuhte chu age group-ah Mizoram ai awh tura koh an nih ṭhin thu leh pofessional player eng emaw zat chu HPC Cup aṭanga inhlang kai an nih thu sawiin, chuti taka rah chhuah nei ṭha a nih avang chuan HPC Cup chu ngaihlu leh a hmawr bawkna hun pawh hmanpui a nih thu a sawi.

Pu Lalduhoma chuan sawrkarna an chan veleh HPC Fund (District Annual Plan) cheng vaibelchhe 5 ni ṭhin chu cheng vaibelchhe 7-a an tihpun nghal thu leh HPC Cup Budget pawh cheng nuai 6 aṭanga cheng nuai 8-a an tihsan nghal thu sawiin, Lunglei HPC chuan ṭhalaite tihhmasawn ngai pawimawhin HPC Lunglei International Fight Night leh Mizorama Badminton prize money tamna ber HPC Badminton Tournament a buatsaih thu te, HPC-MBBA Inter-District Basketball Tournament leh volleyball-ah MVA Cup a sponsor thu te, Mizoram Arm Wrestling Tournament leh naupangte talent hai chhuah nan HPC Young Music Talent 2025 a buatsaih thu te leh infiam mi ṭanpui ngai ṭhahnem tak a ṭanpui tawh thu te a sawi.

Chief Minister chuan C. Ṭhuamluaia Mual chu Lunglei mipuite pun khawmna leh programme pawimawh tam ber dawltu a nih angin a mual chu ṭha tawk hle mah se lirthei dahna tur Parking Area a mumal lo hle tih sawiin, a tawntirhah cheng vaibelchhe 3 man Multi-Level Car Parking siam mek a nih thu leh hei hian harsatna tam tak a sut kian a beisei thu a sawi a. Zan lama inkhelh theiha siam turin Flood Light dahna tur sum cheng vaibelchhe 5 chu SASCI 2026–2027 Priority Project-ah dah fel a nih tawh thu sawiin, infiam mite leh Mual hmangtute mamawh toilet ṭha zawk leh dressing room ṭha a awm theih nan HPC District Annual Fund aṭanga chei ṭhat turin ruahmanna peih fel a nih tawh thu a sawi. 

Chief Minister Pu Lalduhoma chuan ATL Road chu National Highway-a puansak turin MoRTH hnena a dil ṭhin thu leh National Highway lo awm tawh sa a awm avangin, parallel-a National Highway kaltir chu an kalphung a nih loh thua an lo hnar thu sawiin, Aizawl – Thenzawl chin tal puansak tura a dilna erawh chu remtihsak a nih thu leh NHIDCL-in DPR siamtu tur zawnna tender an tihchhuah mek thu leh tender hi tun thla tawpah hawn a nih dawn thu a sawi a. NHIDCL chuan Aizawl – Thenzawl National Highway Alignment chu kumina peih fel a, nakkuma sanction neih hman an tum thu a sawi. ATL Road Haulawng to AOC Ramthar inkar kilometre 34.78-a thui chu SLT Infracon Pvt. Ltd Company te'n an thawh mek thu leh a bak zawng km 29.22 chu sanction leh hmabak a nih thu sawiin, hna thawh mek chu package 4-ah ṭhen a nih thu leh a zavaiin March 2027 chhunga zo tura tih a nih thu a sawi.

Chief Minister chuan SASCI Project hnuaia cheng vaibelchhe 55 senga Lunglei tui lak tihchangtlunna, Upgradation of Greater Lunglei Water Supply Scheme (GLWSS) project thawh mek chu 80% zawh a nih tawh thu leh Febuary 2027-a zawh hman tum a nih thu sawiin, AMRUT 2.0 project hnuaia cheng nuai 997.78 senga GLWSS tihchangtlun hna thawh mek phei chu 99.95% thawh zawh a nih tawh thu a sawi a. Lunglei Municipal Council (LMC) hnuaia Lunglei tihhmasawnna tur project pawm tawh eng emaw zat zingah – cheng vaibelchhe 4 senga Sazaikawa LMC Complex sak tur te, cheng vaibelchhe 5 senga Saikuti Hall chei ṭhat tur te, cheng vaibelchhe 3.5 senga Theiriata Transport Hub sak tur te leh cheng vaibelchhe 2 senga Ramthar AOC-a Marketshed sak tur te a tel thu a sawi.  

Chief Minister chuan Urban Infrastructure Development Fund 2025–2026 aṭangin Lunglei tan cheng nuai 525 dah a nih thu sawiin, Lunglei Park chu cheng vaibelchhe 2 senga chei ṭhat tura peih fel a nih tawh thu te, Lunglei khawpui chhungah Public Toilet pali cheng nuai 25 ṭheuh senga siam tura peih fel a nih tawh thu leh Lunglei khawpui chhung hmun hrang hranga kea kalna footpath siamna tur cheng nuai 225 ruahman fel a nih tawh thu te a sawi a. Mizoram State University (MzSU) chu Lungleia dah tura ruahman fel a nih tawh thu leh a ṭul anga bawhzui mek a nih thu sawiin, Mizoram Engineering College (MEC), Pukpui chu luah theiha chei ṭhatna atan kawng (approach road) siamna atan cheng nuai 1,012 (MPWD kutah), tui pekna leh dah khawlna (water supply & storage) atan cheng nuai 249.44 (PHED kutah), eng pekna leh transformer bunna atan cheng nuai 106.36 (P&ED kutah) leh H&TE kutah campus tihchangtlunna te, hmanrua leh bungraw hrang hrang leina atan cheng nuai 1,435.39 dah a nih thu a sawi a. P&ED leh PHED te'n an hna an zawh tawh thu leh PWD te'n hna 40% an zawh tawh thu te, H&TE aṭanga Campus chei ṭhat hna (physical work) hi 40% vel zawh a nih tawh thu te, a ṭul ang ang chak taka bawhzui zel a nih tur thu te a sawi.

Chief Minister Pu Lalduhoma chuan kar hmasa khan SASCI 2026–2027 Part-I aṭanga hna thawh turte thlan fel a nih thu sawiin, chutah chuan chhim lam hmasawnna tur hna hrang hrang – Lunglei District-ah Lunglei AOC (Ramthar Veng) aṭanga Lunglawn Three Gate inkar kawng siam ṭhatna tur cheng nuai 377, Lunglei Venghluna Multipurpose Building sakna tur cheng nuai 571, Phairuangkaia Agriculture Link Road laihna tur cheng nuai 265, Sawmngai aṭanga Nisapui inkar Economic Road kawng laihna tur cheng nuai 274, Lungsen aṭanga Phairuangchhuah inkar PCC kawng siamna tur cheng nuai 416, Zawlpui aṭanga Khantlang Zau inkar Agriculture Link Road laihna tur cheng nuai 200 leh Dengsur aṭanga Damdiai Zau inkar PCC kawng siamna tur cheng nuai 346; Hnahthial District-a Rotlang East khuaa Agriculture Link Road laihna tur cheng nuai 224, Hnahthiala 132kV Sub-Station bunna tur leh Hnahthial leh Thiltlang inkar 132kV D/C hrui thlunna tur cheng nuai 2,685 leh East Rotlang Water Supply Scheme siamna tur cheng nuai 400; Lawngtlai District-ah Lawngtlaia Lairam Christian Nursing School Hostel Building sakna tur cheng nuai 345 te a tel thu a sawi. 

Chief Minister Pu Lalduhoma chuan Mizoram ṭhalaite'n football leh infiamna dangah theihna sang tak an nei tih hriain, an theihna tipung a, eizawnna tlaka hma an sawnpui theih nan a theihna apiangah sawrkar chuan hma a la zel dawn tih sawiin, naupang talent neite zawn chhuah a, India ram ai awh thei khawpa training ṭha pekte chu an thil tum, a taka an kalpui mek a nih thu a sawi a. Infiam mite pawh ṭang a, hlawhtling tlaka bei tura chahin, Lunglei chu professional footballer neih belh zel a, district dangte hmaa kal, an entawn nih tum turin a chah a. Infiamna chu eizawnna emaw, sum leh pai lak luhna emaw a ni ringawt lo va, taksa leh rilru hriselna te, ram leh hnam chawimawina te a ni tel tih sawiin, nu leh pate chu ruihhlo laka fate ven him nan infiamna tuipui turin a chah a. HPC Cup 2026 a hlawhtlin nana thawktute leh team tel zawng zawng chungah lawm thu sawiin, final khel turte lawmpuina leh duhsakna a hlan nghal bawk.

15th HPC Cup hmawr bawknaah hian Lunglei HPC Vice Chairman Pu V. Malsawmtluanga, Adviser to Chief Minister & Lawngtlai East bialtu MLA Dr Lorrain Lalpekliana Chinzah, Lunglei South bialtu MLA Pu Lalramliana Papuia leh South Tuipui bialtu MLA Pu Jeje Lalpekhlua te, Lunglei Municipal Council (LMC) Chairman Pu Lalzuithanga leh councillor-te leh sawrkar official eng emaw zat an tel.

Lunglei HPC Vice Chairman & HPC Cup Organising Committee Chairman Pu V. Malsawmtluanga chuan hun kaihruaiin, Chief Minister-in 15th HPC Cup hmawr bawkna hun a hmanpui chu lawmawm a tih thu leh Mizoram sawrkarin infiamna leh ṭhalaite tihhmasawn a ngaih pawimawhzia tar lanna a nih thu a sawi.

Mizoram Football Association (MFA) ai awhin MLA Pu Jeje Lalpekhlua chuan thu sawiin, infiamna lama hamsawn turin naupang aṭanga inchher chhoh a pawimawhzia hriain MFA chuan hmun hrang hrangah grassroot training a kalpui ṭhin tih a sawi a. Lungleiah pawh LDFA buatsaihin kum kal ta khan naupang 450 tan match 400 buatsaih a nih thu sawiin, sports hmasawnna atana Mizoram sawrkarin hma a lakna bakah, pawl hrang hrang, nu leh pa leh mipuite'n theih tawp chhuaha infiam mite phurpui a, dawm kang zel turin a ngen.

BCM Rahsiveng bialtu pastor Rev. Dr F. Lalsangliana'n hunserh hmangin, Organising Committee Secretary Pu Rongaia Ralte chuan tournament thuhla a sawi a. Quarter Final-a inhlang kai team 8 leh exhibition match khel team te jersey chu nula thlan bikte'n mipui hmuhah pho chhuakin, zaithiamte zai ngaihthlak a ni bawk a. LDFA President & Organising Committee Working Chairman Pu Pc. Lalramnghaka'n lawm thu a sawi.

15th HPC Cup hmawr bawknaah hian HPC Vice Chairman Pu V. Malsawmtluanga Team leh MLA Pu Jeje Lalpekhlua Team te'n exhibition match khelin, he'ng team-ah hian ram hruaitu (MLA)-te leh hranghlui inkhel thiam rualte an tel a. MLA Pu Jeje Lalpekhlua Team hian 5-4-in hnehna an chang a ni.

15th HPC Cup 2026-ah hian Lunglei HPC chu main sponsor niin, Benjamin Sports leh Samagra Shiksha Lunglei District te co-sponsor an ni a. Inelna huang (category) hnih – Men's team leh Under-16 (Boys) team inelna buatsaih niin, May ni 16, 2026 khan khelh ṭan a ni a. Under-16-ah hian YPC Serkawn leh Mualchin FA Blue te'n final khelin, hun pangngai leh hun pek belhah 1-1-a an inhneh tawk hnuah penalty shootout hmanga a chak zawk zawn niin, Mualchin FA Blue hi 5-4-a chakin an champion a. Men's-ah Zobawk South LC leh Bazarveng LC te'n final hmuhnawm tak khelin, Bazarveng LC team hi 1-0-a chakin an champion thung.

Lunglei District-a khaw hrang hrangte football hmanga inelna HPC Cup hi kum 2011 aṭang khan khelh ṭan niin, "The Greatest Show on Leitlangpui" tia hming lem vuah a ni a. Hnahthial VC team chu champion hmasa ber niin, vawi 5 champion tawh Electric Veng VC team chu champion ngun ber an ni a. Men's team bakah, age group, women leh veteran te a remchan dana telh ṭhin niin, kumin 2026 hian men's leh under-16 inelna buatsaih a ni a. Men's hi Lunglei, Hnahthial, Lawngtlai leh Siaha District chhunga Local Council/Village Council inter-village competition niin, team 29 (Hnahthial aṭangin team 3 leh Lawngtlai aṭangin team 1) telin, player 673 (re-inforce player 126 leh home player 547) te'n an khel a. Under-16 hi Lunglei District tan bik open tournament niin, team 14 leh player 278 an tel thung a. Men's-ah hian final thlengin match 56 khelh niin, goal 400 a lut a. Under-16-ah hian match 25 khelh niin, goal 107 a lut thung.

15th HPC Cup men's champion team hian trophy, certificate leh ₹1,20,000/- dawngin, runner-up hian ₹60,000/- leh certificate an dawng bawk a. Under-16 champion team hian trophy, certificate leh ₹10,000/- dawngin, runner-up hian ₹6,000/- leh certificate an dawng thung. He'ng bakah hian team tan fairplay, semifinalist, quarterfinalist leh participation prize sem niin, mimal lawmman hrang hrang – best player, top scorer, best goalkeeper leh player of the match lawmman te siam a ni bawk.