3475/2024-2025

Saitual, the 11th December, 2024: Vawiin chawhma dar 10:00 am khan Chief Minister Pu Lalduhoma’n Saitual district-ah Excise & Narcotics Station a hawng a. A hawnna inkhawm hi Conference Hall, DC Office hlui-ah neih niin, Excise & Narcotics Minister Pu Lalnghinglova Hmar chuan hun hi a hmanpui.

He hunah hian Chief Minister chuan ruihhlo dona atana hmun pawimawh ni turin Saitual district-ah Excise & Narcotics Station chu hawn a ni tih a sawi a, Sawrkar chuan ruihhlo do leh tih rem hi a ngai pawimawh takzet a ni, a ti.

Chief Minister chuan ruihhlo do kawnga hnathawk turte pawh lak belh a nih theih nan Sawrkarin theih tawp a chhuah tih a sawi a. Khawtlang leh kohhran hruaitute pawhin ruihhlo do kawngah theih tawpa hma la zel tur leh Excise & Narcotics department nen pawha thawhhona tha tak nei turin a chah a ni.

Pu Lalduhoma chuan Sawrkar hnathawkte chu sawrkar rawih an nih angin tangkai taka thawk chhuak tur an ni tih a sawi a, Excise & Narcotics department hnuaia thawktute zawng zawng chu ruihhlo laka fihlim tur leh thahnem ngai taka hnathawk turin a chah nghal a ni.

Excise & Narcotics Minister Pu Lalnghinglova Hmar pawhin thu sawiin Saitualah Excise & Narcotics Department-in hmun an nei ve thei ta chu lawmawm a tih thu a sawi a. Mizoram sawrkarin ruihhlo hluar mek chu a ngai mawh a ni, a ti a, Excise & Narcotics department hnuaiah hnathawk turte la tharin, lirthei 18 te pawh pek an ni tawh tih a sawi.

Excise Minister chuan Saitual chu ruihhlo tlemna ber district ni turin kohhran leh khawtlang hruaitute leh sawrkar department hotute chu Excise & Narcotics department te tha taka thawhpui a, tangrual taka hma la turin a sawm bawk a ni.

Excise & Narcotics Station hi district thar pathum- Saitual, Khawzawl leh Hnahthialah hawn a ni dawn a. Thawktu mi paruk theuha bul tan tur a niin, Saitual station-ah hian Pu R. Lalruatliana chu Officer-in-charge a dah a ni.

Station hawnna inkhawm hi Pu Lalramsanga Sailo, IRS, Secretary, Excise & Narcotics Department in a kaihruai a, Pu Z. Lalhmangaiha, Commissioner, Excise & Narcotics Department chuan an department chungchang report pein, Saitual Bawrhsap Dr. Lalngura Tlau chuan lawmthu sawiin hun a khar ani. He hunah hian Excise & Narcotics Department hotute, khawtlang leh kohhran hruaitute, Saitual district-a department hrang hrang hotute an tel a ni.