1659/2022-2023

Aizawl, the 19^th August 2022 : Chief Minister Pu Zoramthanga, SEDP Governing Board Chairman ni bawk chuan vawiin khan Vanapa Hall-ah Mizoram Sawrkar Flagship Programme – Socio Economic Development Policy hnuaia mimal chhungkua hmasawnna leh an eizawnna tinzawn a eizawnna ngelghet an neihna tur Family Oriented SEDP hawnna programme chu khuallian niin a hmanpui.

Chief Minister Pu Zoramthanga chuan hripuiin Mizoram tiamin khawvel pum kum hnih chhung a tihbuai leh a tuam avangin SEDP pawh hi a pangngai anga kal chhohpui a harsa chungin Sawrkar chuan SEDP hi kan sum dinhmun ngaihtuah chungin a theih ang angin kan tlin chin angin kalpui kan rel tiin a sawi a. Sum leh pai dinhmunin a zir loh avangin a tira SEDP duan ang leh duhthusam anga kalpui chu a theih dawn lova amaherawhchu engemaw zat chu Sawrkarin a ti thei dawn a. Chumi bultan nan Mizoram pumah tun Sawrkar kum chhungin chhungkaw 60,000 chu a target a, cheng 50,000 theuh pek a ni dawn a, hei hi a kumkhatna atana kan bultanna a ni tih hi kan hriat a ngai a. Hei hi a tawpna a ni lova, SEDP in a target kha chu chhungkaw tin tan nuai 3 a la ni a, ala kal zel dawn a ni, a ti. Sawrkar sum dinhmun a that leh zual hunah SEDP in chhungkaw tin tana target chu tihhlawhtlin ngei a beisei thu a sawi. Politics ah chuan inbeihna te, insawiselna te chu a awm lo thei lo tiin heng insawiselna te hi democracy tithianghlimtu a ni, a ti. Covid hripui avangin Sawrkarin sum a dawn tur a dawn tak loh, a hloh chu cheng vaibelchhe 3000 vel a nih thu tarlangin Sawrkarin kum 2022-2023 chhungin Family Oriented SEDP atan vaibelchhe 300 dah anih thu a sawi bawk. 

Chief Minister hian a Ist Instalment atana beneficiary tin te pek tur sum chu a hlawmin Line Department 9 te hnenah a cheque in a hlan a. Agriculture Department chu cheng 23,36,05,500 cheque hlan niin Department hnuaia beneficiary 9161 an awm dawn a; Animal Husbandry & Veterinary Department chu cheng 64,76,74,500 cheque hlan niin Department hnuaiah beneficiary 25,399 an awm dawn a ; Commerce & Industries Department chu cheng 33,82,83,000 cheque hlan niin Department hnuaiah beneficiary 13,266 an awm dawn a; Fisheries Department chu cheng 3,21,55,500 cheque hlan niin cheque hlan niin Department hnuaiah beneficiary 1261 an awm dawn a; Horticulture Department chu cheng 10,39,89,000 cheque hlan niin Department hnuaiah beneficiary 4078 an awm dawn a; Land Resources, Soil & Water Conservation Department chu cheng 14,48,40,000 cheque hlan niin Department hnuaiah beneficiary 5680 an awm dawn a; Sericulture Department chu cheng 76,50,000 cheque hlan niin Department hnuaiah beneficiary 300 an awm dawn a; Tourism Department chu cheng 6,63,000 cheque hlan niin Department hnuaiah beneficiary 26 an awm dawn a leh Urban Development & Poverty Alleviation Department chu cheng 2,11,14,000 cheque cheque hlan niin Department hnuaiah beneficiary 828 an awm dawn a ni. 

Programme kaihruaitu Deputy Chief Minister Pu Tawnluia, Vice Chairman SEDP Governing Board Vice Chairman ni bawk chuan SEDP duanchhuah dan te, SEDP thil tum te, SEDP kalpui nana ruahmanna hrang hrang siamte, an kenkawh dan tur te chu chipchhiar takin a sawi a. SEDP chu Mizoram chakna leh theihna te zirchianga, mipui ngaihtuah leh sukthlek te mila duan a nih thu sawiin Mizoram intodelhna leh hmasawnna tur atan rahbi pawimawh tak a nih thu a sawilang bawk.  Deputy Chief  Minister hian District 11 a SEDP kalpuina atana DC tin atana SEDP sum ruahman chu cheque in a hlan a ni. 

Pu Lalmalsawmna Pachuau, Secretary Planning & Programme Implementation Department leh Member Secretary SEDP Executive Board chuan Family Oriented SEDP hnuaia beneficiary thlan dan te, beneficiary zat te, Trade hrang hrang leh a kengkawh tur Line Department te, thlen chin te, hmachhawp hnaivai leh hmachhawp dangte, endikna kalpui dan te tarlangin Technical Report a hnen atangin ngaihthlak a ni a. Pu H. Rammawi, Vice Chairman, Mizoram State Planning Board leh Vice Chairman, SEDP Executive Board chuan lawmthu sawiin hun  a khar a ni. 

Family Oriented Socio-economic Development Policy (SEDP) in a tum bulpui ber chu mahnia eizawnna (self employment leh kut hnathawh) bultan na atan leh chutiang eizawnna kalpui mekten hma an sawn zel nana an hman tur tanpuina pek leh Mizoram chhunga mimal leh chhungkua, a tam thei ang ber, dimhmun tha zawka hlankai a ni.

‘Family Oriented’ a nih angin tanpuina hi chhungkua anga dawn tur a ni a, chhungkaw pakhat atangin beneficiary pakhat chauh pek a ni dawn a. Agriculture, Horticulture, Animal Husbandry & Veterinary, Fisheries, Sericulture, Land Resources, Soil & Water Conservation, Commerce & Industries, Urban Development & Poverty Alleviation leh Tourism Department te hnuaiah hian trade items 70 chuang (eizawnna kalpui tur) thlan a ni.

Family Oriented thawh khatna (Phase-1) ah hian chhungkaw 60,000 huam turin MLA Constituency tinah chhungkaw 1500 theuh thlan an ni a, tanpuina hi a chunga tarlan Department te kaltlang hian thawh hnih in sem chhuah tur a ni a. Hemi ni hian a thawh khatna atana Department ten an sem chhuah turin cheque vawiin khan hlan an ni.

Beneficiary te Trade thlan dan tlangpui chu a hnuaia Table ang hi a ni. 

Department hnuaia beneficiary zat chu a hnuai ami ang hi a ni

District tina Beneficiary zat chu a hnuai ami ang hi a ni

Beneficiary chhungkua ten an hmalakna tur (trade an thlan) mil Centrally Sponsored Scheme (CSS) emaw, sawrkar atanga scheme dang kal mek emaw atangin an hmalaknate tichak/tanpui thei tur zawngin a theih chin chinah District Level SEDP Committee-te leh Department-te’n ruahmanna siampuiin hma an lakpui thin ang.

Khua emaw, veng emaw azirin eizawnna hlawk zawka kalpui a nih theih nan, a huhova hlawkpui theih tur project he Scheme zulzui hian Department-te’n an siam tur a ni ang. Heng project tha zualte chu a hlawhtlin theih nan sawrkarin a ngai pawimawh ang. 

A theih ang angin khua emaw, veng emawa eizawnna thuhmun kalpuite chu society-a insiam tur a ni a, hma an sawn zel nan District Level SEDP Committee leh Department-te’n loan emaw, subsidy emaw, thar chhuah hralhna (marketing) emaw lamah kaihhruaina an pe ang.