No.3259/2021-2022
Aizawl 2nd December 2021: Vawiin khan Mizoram Chief Minister Pu Zoramthanga chuan New Delhi-ah Gupta Power Infrastructure Limited, Telecommunications Consultants India Ltd. (TCIL) leh EdCIL (India) Ltd aiawh mi pawimawhte nen inkawmin Mizorama hmasawnna ruhrel din dan tur ruahmanna hrang hrang an sawiho.
Hmarchhak state te tana ruahman North East Special Infrastructure Development Scheme (NESIDS) hnuaiah Mizoram chhunga school 190 te tan IT kaihhnawih lam hawi zirna tihhmasawnna tur ruhrel dinna tur rawtna “Implementation of Educational Infrastructure related to IT projects in 190 schools across Mizoram” tih buatsaih a ni a. Sawrkar laipui Ministry of Education hnuaia awm EdCIL chuan North East India ringawtah hian smart classroom 6200 zet an lo siam tawh a ni. Heng smart classroom te hi school-a zirna pangngai atan leh hripui lenlai, a taka school kal hleihtheih loh lai pawha hman tangkai theih tura duan a ni a. Mizorama sawrkar school 190 ah VSAT kaltlanga virtual classroom siam a nih theihna turin ruahmanna siam ni se tih a ni a. He project atan hian senso cheng vaibelchhe 19.79 vel mamawh a ni ang. Hemi chungchang hi vawiin khan Mizoram Chief Minister chuan EdCIL hotute hi a sawipui a ni.
Gupta Power Infrastructure Limited te nen hian khua leh khua inkara kawlphetha thlunzawmna tur leihnuaia kawlphetha hrui (underground electric cable) kaltir dan tur an sawiho a. District thlan bikah enchhinna tur ruahmanna siam ni se, an ti.
Nimina meeting an neihah Union Minister Pu Hardeep Singh Puri chuan Chief Minister hnenah hian Bawngkawn, Vaivakawn leh Chaltlang Bus Terminal dinna tur ruahmanna Detailed Project Report (DPR) buatsaih nan Mizoram Sawrkar tan cheng nuai 61 pek a lo remti tawh a. Chumi bawhzuina kawng khat atan TCIL nen hian vawiin khan meeting hi an nei a ni.
Mizoram Chief Minister Pu Zoramthanga hi State Planning Board Vice Chairman Pu H. Rammawi, Adviser to Chief Minister (Technical) Pu K. Lalsawmvela, leh OSD to Chief Minister Pu Rosangzuala ten heng meeting pawimawhah hian an tawiawm a ni.
