Vawiin khan Chhimveng YMA Hall, Mamit-ah Chief Minister Rural Housing scheme tlangzarhna Programme chu Pu John Rotluangliana, Minister, Transport, FCS&CA, Tourism/Bialtu MLA chuan khuallian niin a hawng.

 Pu John Rotluangliana chuan mi harsa zawkte khaichhuahna tura Mizoram Sawrkarin Scheme a siam chu a lawmawm hle a ni a ti a, tunlaiah unau piang hmunte pawh in hrang chang kan nih tawh chuan sum leh pai a intanpui pawh thil har tak a nih laia Sawrkar kaltlanga tanpuina dawngtute chu lawmna chang hre tura chahin, kan Chief Minister Pu Lal Thanhawla hmalakna leh a rilru ngaihtuahna zawng zawng luahtu mi harsa zawkte khaichuah a nih avanga he scheme hi hmang thei kan ni a ti. Bialtu Minister chuan in leh lo dinna tur central atangin Schemes dang tam tak a awm thin a, mahse hengte hi duh anga rangin kan hmu thei thin lova, kan nghah chhungin Waiting list-ah pawh tam tak kan lo awm hman tawh thin a ni a ti. Mahni in leh lo chu mite angin tha lo mahse kan thla a muang em em thin a, chuvang chuan tanpuina dawngtute pawh an pawisa dawn chu chhungkua thlamuang taka an awm theihna tura an in thawmthat emaw sak that nana hmang theuh turin a chah a ni.

Supply Minister chuan Mizoram Gas harsatna sukiang turin nasa taka hmalak chhoh mek zel a ni a ti a, Mizorama kan Gas dahkhawlna Mualkhang Bottling Plant chu a leng theih tawpa dah pawn ni 2/3 bak min daihloh avangin Bottling plant lian zawk siam tura hmalak mek a ni a ti .Mamit tlangdung Gas harsatna chu Bairabi lam atanga chawlut tura inbiakna kalpui a nih tawh thu a tarlang bawk.

Pu John Rotluangliana chuan Mamit District chhunga matric pass thar zawng zawngte lawmpuina thu a sawi a, a bikin a bial chhung a pass thar zawng zawngte sum leh pai  harsatna avanga zir zawm theilo tur an awm a nih chuan tanpui a in huam thu a sawi bawk a ni.

Pi Lalbiaksangi, District Bawrhsap pawhin thusawiin Chief Minister Special Rural Housing Scheme, in sak thatnan emaw thawmthat nana Sawrkarin hetiang programme an siam chu lawmawm a tih thu a sawi a, Mamit khawtlang leh District mipuite District Bawrhsap a nih chhunga lungrual taka amah an thawhpuinaah lawmthu a sawi bawk a ni.

Chief Minister Rural Housing Scheme hi Mizoram Sawrkar duanchhuah a ni a,  Mamit District chhungah hian he Scheme hnuaiah hian mi 300 tanpui tum a ni a, chhungkaw khat tan hian Rs 50,000/- (singnga) niin Instalment thuma pek an ni ang. Mamit District chhunga Constituency pathuma MLA bial khatah mi 100 zel tanpui tura thlanchhuah an ni bawk a, District chhunga BDO tinte hian vil zui leh enzui hna an thawk dawn bawk a ni.

Chief Minister Rural Housing Scheme hawnna hun hi Pu R. Vanlalsawta, PD, DRDA Mamit chuan kaihruaiin in sak tanpuina dawngtu vawiin bik atana thlanchhuah mi 22 te hnenah Khuallian Pu John Rotluangliana hian 1st Instalment atan Rs 15000/- theuh a hlan nghal a ni. Pu Jacob Lalawmpuia Addl DC, Mamit-in lawmthu sawiin hun a khar a ni.