Chief Minister Pu Lal Thanhawla chuan vawiin khan Champhaiah Champhai Higher Secondary School leh Vanlallawma Indoor Stadium a hawng.

Champhai Vengthlang Northa Higher Secondary School hawnnaah Chief Minister Pu Lal Thanhawla chuan ziak leh chhiara san hi a tawk mai loa, thiamna ziktluak kan neih a tul a ni a ti a. He school dintu Champhai Primary

Agriculture Credit Society in zirlaite hmakhua ngaia thahnemngai tak chung leh sorkar hnik buai tum miah loa School an din chu a lawmawm hle a ni a ti a. Sorkara thil dil tur hria nih hi a zahawm loa, mahni kea din tum hi hmasawnna kawng pakhat a ni a ti. An kal zelna tura an mamawh sorkar hriatpuina chu pek thuai anihna turin hmalak nghal a ni ang Chief Minister chuan a ti.

School hawn tak hi Kumin 2013 School session atanga tan a ni a.Champhai districtah Higher Secondary pakhat chauh a awm avang leh a buildingin zirlaite a zawh loh avangin inelna thianghlim a awm theih nan he school hi din a ni a. Tunah hian Govt Champhai College compund chhunga Women Hostel building an luah hawh mek a, sorkar ah permission leh recognition bak thil dang dil an tum loh thu Managing Board Chairman Pu Lalnunmawia chuan a sawi a. Tunah hian Arts Stream chauh la kalpuiin zirlai naupang 132 an awm mek, zirtirtu 9 non teaching staff pahnih an awm a ni.

School hawnna neih zawh hian Chief Minister Pu Lal Thanhawla chuan Kahrawt Vengah Vanlallawma Indoor Stadium Rs.1159.99 lakhs a sak chu a hawng bawk a. Hawnna inkhawm Basket Ball Court hmuna buatsaihah Chief Minister chuan Mizorama a tha ber tur nia ngaih Vanlallawma Indoor Stadium hawn theih a ni chu a lawmawm hle a, Champhai chauh nilo Mizoram pum ina kan hman theih tur ni a ti a. Stadium hmingah Vanlallawma hming chu lungrual taka thlan anih thu a sawi a. Vanlallawma hi zirtirtu, Champhai khaw tana mi thahnemngai tak thin anih thu Chief Minister chuan a tarlang a. Thalai ten infiamna chi hrnag hrangah hma an sawn theih nan leh world class sportsperson kan chherchhuah theihna turin nachang hria, arkhawthim dai ve mai mailo Sports Minister viak tha tak hoin chak taka hmalak chhoh mek zel a ni a ti a. Zirtirna pe tur pawhin Indian Coach mai bakah Foreign Coach te pawh chah chhuah thin an ni a ti.

Indoor Stadium hawn zawh hian Stdium second floora combat hallah All Mizoram Karate Association, Champhai District buatsaih 12th Inter District Karate Championship 2013 chu Chief Minister hian a hawng bawk a. He Championshipa tel tur hian infiammi mipa leh hmeichhia 146 a lut a ni.

Hawnna inkhawm hi Pu Lalzirmawia Chhangte, Director,Sports & Youth Services in a kaihruai a. chief Minister hi a nupui Pi Lal Riliani bakah Minister Pu Lalrinliana Sailo leh Pu Zodintluanga leh bialtu MLA Pu T.T.Zothansanga ten an tawiawm a ni.

Indoor Stadium hawn tak hi DONER Ministry leh Mizoram sorkar bultuma sak a ni a, a satu hi Pu Hugh Sapthangliana Halliday, Chaltlang, Aizawl a ni a. Kum 2007 October thjla sak tan niin,2012 January thla khan sak zawh a ni. A building hi chhawng nga a sang niin,5263 Sqm a zau a ni a.A hnuai ber basementah hian choka,ddormitory leh dining hall te a awm a, a chung chiah ground floor hi motor park nan leh ticket counter atan a ni a.First floor hi gymnasium a ni a, second floor hi table tennis leh combat hall a ni a, a chhawng chung ber hi basket ball leh badminton court a ni. Lift dah a ni bawk bakah power chawkluh nan 100 Kva transformer leh 125 KVA automatic DC Generator dah a ni bawk.