Chief Minister Pu Lal Thanhawla chuan vawiin khan Legislative Assembly conference hallah Digital India Week leh e-Services a hawng. e-Services a hawn takte hi CM Online,e-District State Roll Out Project, State Service Delivery Gateway/ State Portal Project, Inventory Management System, Excise and Narcotics Department Network leh Online Property Return Software te a ni.

Chief Minister chuan Digital India Week Prime Ministerin New Delhia nimina a hawn tak chu Mizoram pawhin kan zui ve nghal a ni a ti a. Tunlai khawvel changkang zelina a ken tel, internet hmanga mobile te, web technology te, Facebook, Whatsapp, Tweeter leh a dang tam takte hi kan nitin nunah a bet tawh a ni a ti a. Thalaiten abikin an hmang tangkai hle a ni tiin, kum upa lam tawhte pawhin kan duh emaw duhlo emaw kan zir chhoh zel angai dawn a ni a ti. Tunah hian Online in tax te pek theih bakah application form lak nan leh submit nante kan hmang mek a ni a ti. Mobile towerin boruak chhia, radiation a pechhuak thei tia kan insawithaih thin hi Pu Hawla chuan hei hi finfiah a nilo a, finfiah loh pawh a nilo a ti a, departmentin harsatna a tawh phah a ni a ti.

Mizoram chu hmun kilkhawra awm kan nih avangin Information Technology  hi hmang tangkai tur kan ni tiin, Chief Minister chuan internet hi duh angin kan hmu tha lo a ti a. Optic Fibre Cables (OFC) leia phumte misualin ruk an chin avangin internet hi a tichaklo thei a ni tiin, hmasawnna tithuanawptu te lakah heng kan thil neih that te hi kan ven tlan a pawimawh hle a ni a ti a. Internet connection tichak turin power supply tha kan mamawh a, World Bank atangin tanpuina beisei mek a ni a ti a. Sorkarin hmasawnna huapzo, inclusive growth a kalpui mek hi chak leh zual kalpui anihna turin mipuiten tan kan lak tlan a tul a ni a ti.Sorkar kan tanpui theuh hi mitin bat a ni a ti.

Chief Minister chuan Digital India Week hi a kamkeuna programme chauh a ni a, hapta chhung lek nilo, kumtluana kalpui tur a ni a ti a. Hei hian thalaite tan hnathawh tur a siam ngei a beiseiawm a ni a ti a. A hlawhtlinna turin department hrang hrangte ah thui tak a innghat a ni a ti.

Digital India hian India khua leh tui dik tak ten sorkara hamthatna tam tak awmte electronics kaltlanga an hmuh theihna tur leh information and communication technology thar ber zel an tangkaipui theihna tur a ni a. Prime Minister Narendra Modia’n a hawn tak scheme tam tak awmna Digital Locker, e-Education, e-Health, e-Sign leh a dang te tan hian cheng vaibelchhe nuai khat aia tam dah a ni.

e-Services hawn taka CM Online hi Chief Minister Office kaltlanga sorkar department te leh mipui te hnai zawka an inpawhna tur a ni a. Mi tupawhin mobile leh web access hmangin an thil hriat duhte an thehlut thei dawn a, an zawhna te hi digital formata dahin a dinhmun pawh an umzui thei dawn a ni. e-Services dangte hi sorkara thil hriat duh an neihte office ah kal ngai kher loin an zawhnate online hmangin an thehlut thei dawn a ni.

Hawnna inkhawmah hian Ministers, MLA te bakah official, zirlai leh Tlawmngai pawl hrang hrang hruaitute an tel a ni.