Chief Minister Pu Lal Thanhawla chuan vawiin khan a office cabinet room-ah Minister Pu Lal Thanzara enkawl department hmachhawpte a sawipui.

Chief Minister chuan thuhma a sawiah meeting hi sorkar department tinte kalphung thara hmasawnna chak zawk leh awmze neia ke an penna tur kawngah mumal tak leh inrenchem chunga langtlang sorkar an siam theih nana rawtna pasarih theuh tal siam tura a tih bawhzuina anih thu a sawi a. Health departmentin hmachhawp a neihte sawihoin, sorkarin mipuite hriselna a ngaipawimawh a ni tih hriain hospitalte leh sub centre thlenga mipui ten damdawi a thlawna an hmuh theihna turin Chief Minister Free Medicine Scheme siam nise meeting chuan a ti a. Department-in inrelbawlna tha a neihna turin expert team dina, chumi chuan ‘professional manpower plan for health department’ duan nise a ti bawk a. Food and Drug administration wing pawh chak taka hna a thawk thei tura siam nise an tih bawk bakah transfer & posting chungchangah committee din nise tihte an rel a ni. Hengte bakah hian rawtna leh ruahmanna dang dang an neih dang tam tak sawihona neih a ni bawk.

Health Department rawtna te sawiho hnuah hian Minor Irrigation department hmachhawpte pawh sawihoinchak leh zuala administration kalpui anih theih dan tur leh division thar hawn chungchangte sawiho a ni a. Information & communication Technology department pawhin ruahmanna thar an siam te an sawiho bawk a ni..

Meeting-ah hian Health Minister Pu Lal Thanzara, Chief Secretary Pi L.Tochhawng, Health Secretary ni bawk, Pu Lalram Thanga, Principal Secretary to Chief Minister leh Health department hotute an tel a ni.