Cheng nuai za senga sak, Mizoram Table Tennis Hall, Aizawl Mission Veng Kawltheihuana Land Revenue Department ram thina sak chu vawiin khan Chief Minister Pu Lal Thanhawla chuan a hawng.

Hawnna thu a sawiah Chief Minister chuan thalaite tana khawvel thar siam chu sorkarin a tum ber pakhat a ni a ti a. Hemi kawngah hian hlawhtlinna engemawzah chu hmu tawh mahila, sum harsatna avangin duh angin a kal chak theih loh a ni a ti a.Mizorama sports discipline pakhat pual bika sak hmasak ber Mizoram Table Tennis Hall kan nei thei ta chu a lawmawm hle a ni a ti a. He hall thar hi Mizoram thalai ten an talent an phochhuah theihna tura hmang tangkai tura a duhthu a sawi a.Infiamna hi kan taksa hriselna atan mai nilo, nun kawng tha min kawhhmuh theitu a ni Chief Minister chuan a ti a. Mizoramah infiamna hmunhma tha leh trainingna te kan neih that loh avangin kan thlen tur chin kan thleng phak thin lo a ni a ti. Thalite chu discipline tha, chhung lam leh pawnlamah vawng reng turin a chah a ni.

Khaulzahawm Pu Zodintluanga, Sports Minister chuan thalai te tana ngaihtuahna Chief Ministerin a sen tam zia sawiin, a hmalakna avangin sports discipline hrang hrangah national levelah medal kan dawng thin a ni a ti a.Heng medal kan dawnte hi kan hmuh tur rengah kan ngai tan tawh a a hriat thu a sawi a. National level mai nilo international levela lawmman dawng thei tura tan la turin thalaite chu a fuih nawn a. Indoor games hrang hrangah Mizo thalai ten India hming kan titha tan chho chu lawmawm a tih thu sawiin, snooker ah special training nei turin Sheffield, UK ah Mizo thalai tirh tum a nih thu a sawi bawk a. He table tennis hall thar hi Mizo thalaite zawng zawng tan a ni a tiin, abikin Zokhaw lama awm ten an talent haichhuah nana hmang tangkai thin turin a chah bawk a ni.

Table Tennis hall thar hi Mizoram State Sports Council enkawlna hnuaia sak a ni a. Mizoram Table Tennis Association te nen inrawn chho reng chunga sak a ni a. Kum 2013 ah sa tanin kumin 2014 July thla khan sak zawh a ni a. A dung hi 24 metres, avang 12 metres leh a san zawng hi 7 metres a ni a. Inkhelna area hi 205.80 sq m a ni. Table Tennis Board 6 dah theih a ni a, competitionah chuan pali dah thin a ni ang. Hallah hian inthlakna room 2, meeting room 1, official room 1 leh inthiarna 4 a awm bawk a ni.A chhuat hi cement plaster chungah Rs. 3.45 lakhs man Stag Synthetic Flooring phah a ni bawk.

Hawnna inkhawm hi Pu Zothankhuima, IAS, Secretary, Sports & Youth Services in a kaihruai a ni.