Phullen leh Phuaibuang leh a chhehvel khuate inkalpawhna tur, Phullen atanga 25 Kms vela hlaa awm, Mizoram Public Works Department (PWD) enkawl, Tuivai Lei, Built Up Girder Steel Bridge chu vawiin khan Chief Minister Pu Lal Thanhawla chuan a hawng. 

Hawnna inkhawm Tuivai Lei bul tuala buatsaihah Chief Minister chuan phairama  lei lian pangngai ang Mizoram PWD in an dawh thei chu hmasawnna rahbi tha tak a ni a ti a. A hawnna a Tuivai kual khaw chhevela chengte thahnem tak an kal chu lawm nachang an hria tih a tilang a, a lawmawm tak zet a ni a ti a. Hmasawnna awm turin bial chhung mipuite chuan phur taka sorkar an tawiawm a pawimawh a ni tiin, helaia hmasawnna lokal hi a dang pawhin ala rawn zui zel ang a ti. Pu Lal Thanhawla chuan hmasawnna a lokal dawnin mipui ten alo dawnsdawn dan kan thiam a tul a, Phullen leh Phaibuang inkar kawngpui black topped tur pawh mipui ten a thawktu turte tha taka lo tawiawm a, a tul apianga lo pui turin a chah a. Thil tha kan duh anih chuan kan tih tur leh tih loh turah kan chian angai a, he Lei hi tlo tak leh tha taka hman anih theih nan helai Tuivai kuala chengte an pawimawh hle dawn a ni a ti.

Tuivai Lei hi 73.20 metres a sei a ni a, kum 2002 September thla khan Guwahati a Buildworth Pvt Ltd in a dawh hna bul tanin, kum sarih chuang zet chhung pawha an dawh zawh theih loh avangin chawlh tir an ni a, kum 2010 December thla khan Guwahati company tho Mechfab Engineering Industries Pvt Ltd  chu hna chhunzawm tir an ni a, November 2012 khan dawh zawh fel a ni. A senso zawng zawng hi avaiin Rs.316.71 Lakhs hman a ni.A chhuat hi reinforced cement concrete a ni a, a kawng zau zawng hi 4.25 metres a ni.

Hawnna inkhawm kaihruaitu Pu Lianchungnunga, Engineering in Chief, PWD chuan hetiang leilawn pangngai hi Mizoram PWD in pali an dawhna a nih thu a sawi a, tlo tur leh chhe mai mailo tur (permanent) lei anih thu a a sawi a. Lei dang an dawh thin, Bailey Bridge hi chu daihreilo chi semi permanent, lei dawh nana thir siamsa remkhawm mai chi a nih thu a sawilang a ni.

Chief Minister hi a nupui Pi Lal Riliani bakah bialtu MLA Dr.Ngurdingliana leh Pu Lalram Thanga, Principal Secretary, PWD ten an tawiawm a ni.