Chief Minister Pu Lal Thanhawla chuan vawiin khan Union Christian College (UCC), Barapani, Shillong in kum 60, diamond jubilee a tlin lawmnaah khuallian niin a hmanpui.

Chief Minister chuan kum 60 hi hun rei tak a ni a, hemi hun chhung zawng hian UCC hian hmarchhaka tribal hnam hrang hrangte puih hna a thawk hi a ropui hle a ni a ti a. Christianna-a innghat, he zirna in danglam tak hi keini Mizo te chu a chhawr berte zinga mi kan ni a ti a. Umiam dil mawi tak bula awm, a chhehvel nuam tak leh boruak tha tak hnuaiah hian Mizo zirlai thahnem tak an lo kal tawh thin a ni tiin, Mizo officer, kohhran hruaitu leh hna dang danga thawklai leh pension tawh tam tak UCC ah hian an zir thin a ni a ti.

Chief Minister chuan diamond jubilee hmang tura an sawm chu a lawm tak meuh a ni tih a sawi a. He zirna in atanga zirchhuak chhuanawm tak takte lists han en hian kawng hrang hranga in thawhna hi a fakawmzia a tarlang a ni a ti a. Hei hian zirna hi degree neihah a tawp mai lo a ni tih tichiangtu a ni a ti.

1952 kuma tlawm taka lo ding tan kha tunah chuan kan chhehvela zirna in tha berte zing ami a rawn ni ta hi a ropui hle a ni Pu Hawla chuan a ti a. India Danpuiin a tum pakhat, Zirlai te hnena zirna sang zawk eng pek chu UCC thil tum pawimawhte zinga mi a ni nghe nghe a ni a ti a. Zirna, education hi hmasawnna innghahna bul a ni a, Christian Missionary te khan education hlutna min lo zirtir kha lawmawm ka tih rualin, hemi thuphung hi UCC hian a kalpui hi a danglamna tak a ni nghe nghe a ni a ti.

Chief Minister chuan UCC in a kum 60-na a lawm hian zirlaite leh zirtirtute chu education meichher hi kum lo awm leh zel tur thlenga vawng nung reng turin a chah a. College Principal leh a Staff te, zirlai zawng zawngte chu duhsakna a hlan a ni.