Vawiin chawhnu khan Directorate of School Education bultumin kumin HSLC leh HSSLC-a a titha zualte chawimawina, Chief Minister’s Award to Toppers hlanna hun chu Vanapa Hall-ah hman a ni a. Education Minister Pu H. Rohluna chu Khuallian niin Parliamentary Secretary Pu Joseph Lalhimpuia chu Khualzahawm a ni.

Pu H. Rohluna chuan topper-te chu a lawmpui rualin an hlawhtlinna chu a tawpna a ngai lova, bultanna rahbi pawimawh takah ngai zawk turin a duh a. Zirlaite chu ram tana chhawrtlak mi puitling ni tura chherchhuah an duh thu sawiin, chhui zui tlak chanchin tha an neih loh chuan mi hlawhtlinga chhiar an ni ngai lovang, a ti. Thawhrimna pumpelh a thianglo tiin, zirlaite chu certificate neih mai duh tawk lo a ram dangte el phak khawpa thiamna tak tak nei turin a chah a. Nu leh pa, zirtirtute leh zirlaite chu inlaichhinna tha nei turin a duh thu a sawi bawk a ni.

Pu Joseph Lalhimpuia chuan topper-te chu tihtak zeta a lawmpui leh chhuanzia sawiin chhungte thlawpna leh zirtirtute thawhrimna rah a ni, a ti a. Kum 1894-a zirna mumal tan a nih atanga kum 123 chhungin Zofate’n zirna lamah nasa takin hma kan sawn a ni, a ti a. Selection Test tihbo a nih hnuah kum dang aia HSLC leh HSSLC result tha zawk kan nei chu kan zavaia thawhhona leh tanrualna vang a ni, a ti bawk.

Programme hi School Education Addl. Director Pu K. Lalrintluanga’n kaihruaiin Topper neitu school aiawh Principal-te’n thu tawi an sawi a. HSSLC-a stream pali topper-te leh HSLC topper hnenah lawmman hi hlan a ni.

Chief Minister’s Award to Topper hi kum 2013 atanga sem tan tawh niin citation leh pawisa fai cheng singnga a keng tel a ni.