2611/2024-2025

Dated Aizawl, the 19th October, 2024: Vawiin khan Art & Culture Department leh Central YMA te tangkawpin an buatsaih Chief Minister's Running Trophy  vawi 13 na - Hnam Lam Intihsiak kharna, Dawrpui Multipurpose Centre-ah buatsaih a ni a. Chief Minister Pu Lalduhoma chuan khuallian niin a telpui a, Pu C. Lalsawivunga, Art & Culture Minister chu khualzahawm a ni.

Thu a sawinaah khuallian chuan, hnam dangte laka hnam dang min nihtirtu chu kan zia, kan tawng, kan zai leh lam, kan nunphung leh kan tihdan hrang hrangte hi an ni a. Chu chu Pathian min pek a ni. Mihring hi awmreng mah ila kan hnam ziate hi a bo si chuan, hnam bo kan ni mai ang. Chuvang chuan kan tihdan tha tinrengte hi kan chhawm nung zel tur a ni a, kan zahpui tur a ni lo. Kristianna hian kan hnam zia tam tak min thlaksak tawh a. Tunhma deuh chuan Mizo irawm chhuak hlate Biak inah kan sa duh meuh lo va, khuang lakluh takngial pawh kan rem ti lo va, Mizo incheiin kan inchei lut ngam mang lo va. Vawiinah erawh chuan chung te chu a lo bo ta tial tial a, kan Kristiannaah kan hnamzia a lo leng chho tial tial ta. A nihna takah chuan Seki leh Tingtangte nena Pathian fak te hi Pathian thu nen pawh a inrem thlap a, kristianna leh kan culture hi rem takin a kaldun thei ni. Tin, khawvel huapin kristianna hi thlir ila, hnam ze mila kristianna an kalpuina hmun apiangah kohhran hi a nghet a, member pawh an pung chak thin. Kan culture hian kan hnukah min man tlat a, kan ngaina theuh a ni. Kristianna nen inmil takin i kalpui tlat ang u.

Mizo culture hian khawvel zau zawk a thleng chho zel a, khawvelin min hmelhriat tial tial a ni. Nasa lehzualin i uar deuh deuh ang u. Hnam lam intihsiakna vawi 13 zet an lo buatsaih tak avangin Art & Culture Deptt leh Central YMA te chungah lawmthu ka sawi a, Thingtlang lam leh Manipur atang tea lokal an awm hi a ropui hle a ni, a ti bawk. 

Khualzahawm Pu C. Lalsawivunga pawhin thusawiin, hnam changkangten hmasawnna leh an hnamzia an kal kawptir thiam a, hmasawnna ke pen nghet an nei thin. Kan kristianna leh kan hnam ze thate keng tlat chungin hma kan sawn tur a ni a, chu chu hmasawnna dik chu a ni, tiin hnam zia ngaihhlut tlat a tul thu a sawi a. Chief Minister tirhin hman ni lawk khan Istanbul-ah Cheraw zuk entir a ni a, hnam dangten hmuhnawm an ti a. An ngaihlu em em a ni. Kan hnam ziarangte hi an chhuanawm a ni tih hrereng ang u, tiin YMA member te a chah a ni. 

A kharna inkhawm hi Pi Carol VLMS Dawngkimi, Director, Art & Culture in a kaihruai a, Pu Lalhmachhuana, President, Central YMA in thusawina a neih bakah Pu C. Lalthlamuana, Secretary, Cultural Sub Committee chuan report a pe bawk.

Kumin intihsiaknaah hian Branch YMA 42 ten Khuallam leh Cheraw ah te inelna an nei a. A pumpuia lawmman (Chief Minister Running Trophy) dawngtute chu:

Pakhatna Chanmari West Branch YMA leh pahnihna Vaivakawn Branch YMA te an ni.

Intihsiakna mala lawmman an lak dan chu: Cherawah hian pakhatna Chanmari West Branch YMA, pahnihna Lamka Branch YMA leh pathumna Ramthar Branch YMA.

Khuallamah hian pakhatna Vaivakawn Branch YMA, pahnihna Chanmari West Branch YMA leh pathumna Pawlrang Branch YMA an ni.

Inkhawm hi Pu Roneihthanga, Treasurer, Central YMA chuan lawmthu sawiin a khar a ni.