1814/2025-2026

Aizawl Dated the 25th August 2025: Vawiin khan Government Aizawl College chuan an college kum 50 tlin lawmna, Foundation Day chu an College Campus, Mualpuiah an hmanga, Chief Minister Pu Lalduhawma chuan khuallian niin a hmanpui.

Thu sawiin Chief Minister chuan, Govt. Aizawl College thawktute, zirlaite, lo thawk tawh leh zir tawh zawng zawngte a lawmpui a. College kal zelna turah duhsakna a hlan.

Campus thar in nei a, hmasawn zel turin mamawh tam tak in la nei tih kan hria a. Sorkar chuan kan tih theih apiang kan ti zel dawn a ni. Cyclone Remal vanga harsatna in tawhte siam thatna tur retaining wall & drainage atan Rs. 36.54 lakh SASCI atangin kan ruahman a. Commerce building vertical extension-na tur drawing hi PWD lamin an zo tawh a, estimate vel an buaipui mek a, kan bawhzui zel ang. PM USHA hnuaia Gender Inclusion & Equity Initiative component tangin Aizawl leh Lunglei district-a kan college-te tan Rs. 10 crore kan dawng a. Aizawla kan college pariatte tan works bikah Rs. 625 lakh kan dah a. GAC hian Rs. 90 lakh vel in chang a, tender kan chhuah mek, tiin an college tana sorkar hmalakna langsar zual a tarlang.

Zirna sang zawk atana sorkar hmachhawpte sawiin Chief Minister chuan, Mizoram State University din tumin hma kan la a. Kum 2036 hmaa lo neih fel hman kan tum a. Administrative Building hi Luangmuala sak kan tum. A bul lo tantu tur thawktu pawh kan la thuaiin a rinawm.

Mizoram Engineering College, Lunglei Pukpuia mi saw a taka function-tir kan tum a. Kum 2026 Academic Year atanga zirna tan tumin thawktu thar mi 63 kan la dawn a ni. A hmunhma thawm that nan tun hnai khan Rs. 2541.19 lakh kan sanction bawk.

India ramah hian zirna in tha bik, khawvel huapa mithiam ber ber chherchhuak thin ‘Institute of National Importance’ tia koh kan nei a. Heng zinga Mizoramin kan neih ve NIT Mizoram Campus hi Lengpuiah kum 2009 khan sak tan a ni a. Forest Clearance nei lo va sak a nih avangin kum 2017-ah hna zawng zawng tihtawp a ni a. Rs 20 crore chuang chawi tura tih kan ni zui a. Mizoram tana NIT hlutzia kan hriat avangin kan sorkar veleh kan umzui nghal a. Central lamah kan lei chawi tur hi ngaihdam kan dil a, crore 10 chuang min ngaidam a. A bak kan pek turte chu kan pe vat a, Campus sak hna hi chhunzawm theih a ni leh dawn ta a ni.

Mizoram Polytechnic, Lunglei pawh saw, a ram neitute phalna la lova sak a lo ni a. He harsatna pawh hi chinfel kan duh a, hma kan la mek.

Assistant Professor hi qualify lo engemaw zat lak an lo ni a. Qualify vek turin sorkar hian vawi tam tak chance a pe tawh chungin la qualify lo 31 vel an la awm. Tunah hian an zinga 10 vel hi Court-ah an kal a, Court thutlukna hi kan ngaichang mek, a ti.

Sorkar hna lak thuah an fimkhur thu pawh tarlangin, tun hnaiah NHM hnuaia hnathawktu pawl pakhat chuan sorkar hna lak thar turah an tana reservation siam turin sorkar an ngen a. Nimahsela, lak an nih dan kan han zirchian khan India Danpui kalha lak an lo ni a. Keinin lo dah nghet ta ila, miin Court-ah min khing se, kan tla sa a ni. Lainatin duhsak em em mah ila an dilnate chu kan ‘Aw’ ngam ta lo a ni.

Tun hnaia Mizoram Police Constable 259 kan lak thar takte kha, a buaipuitu kan Police Officers ho chuan “Mizorama police lak tawh zawng zawngah a la fair ber” an ti ngat a ni.

Kan thalaite tan hian remchang (opportunity) hi kan siam hnem tawh hle a. Nikumah Casual Teacher 1369 kan la a, Police constable 259 kan la a, post hniam lam lak thar phei chu a tam tawh lutuk. Tunah pawh Health Worker tam tham tak kan la leh dawn. Officer Recruitment pawh a kal reng a, MPSC calendar saw a khat thin hle, a ti a.

Ziak leh chhiar thiam tamna state ni chungin, India rama institution tha ber bera lut thei tam lamah te, National Level Competitive Exam-ah te chuan kan la hniam hle a. Kan tribal-puite zingah tluk loh kan la ngah hle. Tuna GAC zirlai naupang 1944 te hi chuan he kan mutan hi rawn kheng thla ula, Mizoram hming timawitu, ram hmasawnna thlentu nih in tum theuh dawn nia, tiin a chah.

Pu Lalbiakzuala, Principal chuan kalkhawmte lawmna sawiin College chanchin tlangpui a tarlang a. Chief Minister-in a telpui avangin lawmthu a sawi a ni.

Foundation day-ah hian an college atanga zir chhuak leh College Faculty zinga MLA leh Minister lo ni tawh leh ni mek mi 26  leh Principal lo ni tawh mi 13 te chawimawina hlan an ni.

Govt. Aizawl college hi kum 1975 ah khan mi tlawmngaiten an din a, kum 1989 ah sorkarin a la zui ta a. NEHU hnuaia college langsar tak a ni zui ta a ni. Tunah hian BA, BCom leh MA Education zirna awmin Mizoram sorkar college zinga zirlai ngah ber an ni a, zirlai 1944 an awm mek a ni.

Golden Jubilee pual hian programme chi hrang hrang; Thanksgiving, Jubilee Ride, Pensioners Meet,  Alumni Reconnect, Blood Donation, Outreach, National Seminar,  Inter College Basketball Tournament, Inter Higher Secondary School Dance Competition, leh luanchhuah programme te an lo buatsaih tawh a ni.