No.4417/2021-2022 

Aizawl, the 26^th March 2022 : Vawiin khan Chief Secretary Dr. Renu Sharma chuan Bairabi-Sairang rel kawng sial mek ‘New BG Line from Bairabi to Sairang’ chhunga Sairang leh Khamrang inkara hna thawh mek hrang hrangte a hmunah a endik a. Chief Secretary hi Pu K. T. Beicho, Commissioner & Secretary, Transport Department; Pu Hrangtawna (IRTS Rtd.), Consultant (Railway) leh I & PR Department aiawh ten an tawiawm a ni.

Chief Secretary chuan Sairang Zero Point atangin hna thawh mekte en tan in, Khamrang thlenga - hmun hrang hranga leiverh (tunnel) te, lei dawh(bridge) innghahna tura a dona ‘Pier’ chhun mek leh chhun zawh tawh te, Khamrang leh Mualkhang bula leidawh(bridge) chunga ‘superstructure’ thir a leidawh rel mek, rel tlanna tur dawh mek te, hmun thenkhata rel tlan na tur track sial mek te leh Sairang leh Mualkhang a Rel Station building sak mek te chu a hmunah a tlawh in hna thlen chin te a endik a. Heng hmun hrang hrangah te hian Indian Railways hnuaia he hna viltu - Northeastern Frontier Railways a Deputy Chief Engineer (Construction) Pu Harjemal Meena leh Executive Engineer(Contruction) Pu Malay Baruah te chuan an thlen chin leh an hmabak te drawing leh site plan te hmangin Chief Secretary hi an hrilhfiah a ni.

Chief Secretary Pi Renu Sharma chuan he project hi Mizoram tan mai nilo rampum huap pawha National Project pawimawh leh ro tling anih avangin hna hi tluang taka a kal a pawimawh tiin hnathawh chungchangah engemaw harsatna an tawh chuan chungte chu rang taka State Sawrkara thuneitute hnenah thlen vat thin turin Railway engineer he hna viltu te chu a chah a ni. 

Tarlan tawh thin angin Bairabi-Sairang rel kawng hi Broad Gauge Railway Line tur a ni dawn a. RITES ten he rel kawng sial survey hna hi 2005 bawr khan an zo fel a. Hna hi Sawrkar Laipuiin kum 2008-2009 khan sanction-in a tira estimate hi cheng vaibelchhe 2384.34 a ni a. Hna thawh man hi revise zel niin tunah chuan he rel kawng siam zawh nan hian cheng vaibelchhe 6547 bawr vel senral a ngai dawn nia chhut a ni. A hna hi 2015 ah khan tan niin Railways engineer he hna viltu te chuan November/December 2023 ah zawhfel beisei a nih thu an sawi. Hna hi za zelah 70 vel thawh zawh tawh niin an sawi bawk. 

Bairabi atanga in tanin Sairang huam telin rel station pali a awm dawn a. Chungte chu Bairabi atanga a hlat zawng tehin, km16.38 ah Hortoki Rel Station; km 26.10 ah Kawnpui Rel Station; km 37.12 ah Mualkhang Rel Station leh a tawpna km 51.38 ah Sairang Rel Station (Sihmui chak) te an ni. Heng hmuna rel station building thenkhatte te chu sak zawh thawkhat an ni tawh a ni.

Sairang Rel Station hi Terminal Station - Coaches maintenance na hmun tur anih dawn avangin station dang 3 aia lian deuh zawk tura buatsaih mek a ni a. He station-ah hian Passenger ten Rel an lo channa tur ringawt Platform 3 awm tura ruahman a ni a. Line 7 : Passenger line 3, Bungraw phur (Goods Line) line 3 leh maintentance & Service line 1 lai a awm dawn a. Bungraw phur bik tan pawh Goods Platform siam a ni dawn a ni.

Bairabi Rel Station leh Sairang Rel Station inkar rel kawng thui zawng hi km 51.38 niin lei dawh lian(major bridge) 55 leh lei dawh tenau (minor bridge) 87 lai a awm a. Lei dah lian 55 chunga rel kawng thui zawng belhkhawm ringawt pawh hi km 11.61 a thui/sei a ni.  

Bairabi leh Sairang inkara hian hmun 32 laiah leiverh tunnel a awm a, leiverh  zawng zawng thui/sei belhkhawm pawh hi km 12.63 a ni dawn a. Leiverh tunnel thui ber sei/thui zawng chu km 1.88 a thui a ni. 

He project atan Railways in ram hectare 481.18 a zau an hmang mek a. Kolasib District huam chhung ah forest ram hectare 38.94 a zau leh non-forest land mimal ram hectare 308.01 a zau leh Aizawl District huam chhung ah forest ram hectare 35.547 a zau leh non forest land mimal ram hectare 98.595 zau an hmang a. Heng zawng zawng ah hian zangnadawmna compensation vaibelchhe 840 bawr vel ram neitute pek an nih tawh thu Railways lamin an sawi a ni. 

Sairang Zero Point bula lei dawh tur hi le project a hna hautak pahnih zinga pakhat niin helai hmuna lei dotu pillar pahnih chu metre 91 leh metre 101 laia sang an ni a.  Lei dotu ban sang pakhat zawk metre 91 a sang hi zawhfel tep niin lei dotu ban 101 metre a sang hi a foundation hna khawih mek a ni a. He lei dotu ban metre 101 a sang phei chu a ban bulthut Kunrung lui atanga tehin metre 115 laia sang a ni dawn a ni. Helai bulah National Highway Aizawl pan chhohna chu Railway track hnuaia kal tura her rem a ngai dawn a, a diversion hna hi thawk mek a ni. 

Rel kawng sial hna hi Indian Railways hnuaiah Company hrang hrangin an thawk mek a. Tunah hian chhunzan zawmin mi 2800 bawrin hna an thawk mek a ni. Bairabi – Sairang rel kawng hi Indian Railways in project hautak an thawh zinga tel in lei dawh leh lei verh te hi hna hau tak a ni a. Lei dawh innghahna tur ban sang tam tak awm hian hna a ti hautak hle a ni.